Thursday, November 12, 2015

COA Dismayado sa Polysports; Kapalpakan Nabesto

Ni Alex Mapoy
BUTUAN CITY POLYSPORTS COMPLEX. Nasuta sa Technical Evaluation Report for Infrastructure Project sa Commission on Audit (COA) Caraga nga sa maong proyekto lugi ang goberno. Gawas nga lugi, wala kapasar ang winning bidder sa gikinahanglang rekisitos ug expire pa ang mayor’s permit.
BUTUAN CITY – Dismayado ang Commission on Audit (COA) Caraga sa resulta sa gihimong Technical Evaluation sa komisyon ngadto sa Butuan City Polysports Complex nga nahimutang sa Barangay Tiniwisan sakop ning siyudad.


Hisayran ang maong proyekto dunay Approved Budget nga P253,000,000 samtang ang Contract Amount dunay P252,939,664.26.

Ang dapatan sa multi-million nga kantidad mao ang pagpabarug sa Gymnasium, Stadium, Oval, ug Football Track and Field.

Pinasikad sa Technical Evaluation Report sa Infrastructure Project sa komisyon nga gipagawas adtong Agosto 18, 2014, nadismaya si State Auditor V Celso U. Reyes human na obserbahan ang pipila ka mga butang nga gikonsidera sa komisyon nga lugi ang goberno.

Nakita sa komisyon nga ang Contract Cost nisubra sa COA Evaluated Cost og 7.07 porsyento (7.07%).

Kon basehan ang COA Evaluated Cost, ang maong proyekto moabot lamang og P236,236,140.28 mas ubos og P16,703,523.98 kon itandi sa Contract Cost sa winning bidder nga  P252,939,664.26.

Nasuta nga ang price proposal sa winning bidder naglakip sa Bonds & Insurance, Power & Water Consumption, telephone & Internet Expenses ug Office Equipment.

Ang maong galastohan niabot sa P2,188,304.16 kansa kabahin nang daan sa Indirect Cost pinasubay sa DPWH Department Order No. 72, Series of 2012 ug maapil sa galastohan isip kabahin sa “pay item” nga magresulta sa “double costing” sa proyekto, hinungdan ang maong kantidad tibuok nga makuha gikan sa contract cost.

Samtang ang kinatibuk-ang backfill materials nisubra og 1,509.59cu.m. katumbas sa P1,040,152.80.

Gawas niana, nasuta usab sa komisyon nga ang mayor’s permit nga gisumite sa winning bidder ang expire na adto pa lang Desembre 31, 2012 samtang ang bid opening gihimo adtong Enero 16, 2013 kansang dokumento nagsilbing Mandatory Eligibility Requirement sa maong proyekto; wala usab nipasar ang winning bidder sa Additional Eligibility Requirements alang sa maong proyekto human nasuta nga walay nahuptan nga ISO certification; walay nahuptan nga sertipikasyon nga magpamatuod nga accredited kini sa DPWH; walay nahuptang Equipment Certificate of Inspection gikan sa DOLE; ug walay Certificate of Operators gikan sa TESDA nga gikantar sa Bids and Awards Committee (BAC) adtong panahona ingon man sa “guidelines” nga nakalatid sa SP Resolution No. 003-2012 o mas naila, “A Resolution Requiring All Prospective Contractors/Bidders to Submit Additional Requirements.”



No comments:

Post a Comment