Wednesday, November 4, 2015

Butuan City Polysports Complex, Imbestigahan

Ni Alex Mapoy
POLYSPORTS COMPLEX. Sa Technical Evaluation Report for Infrastructure Project sa COA nga gipagawas adtong Agosto 18, 2014, gilapas sa implementing agency ang guidelines nga gitakda sa SP Resolution No. 003-2012. Gipasagdan usab sa panggamhanang lokal nga ipadayon ang implementasyon bisan pa man og wala nakasunod ang winning bidder sa gitakdang guidelines sa pagpatuman sa maong proyekto.

BUTUAN CITY – Girekomenda ngadto sa Committee on Infrastructure sa Sangguniang Panlungsod ning siyudad nga pa imbestigahan ang implementasyon sa Butuan City Polysports Complex sa Barangay Tiniwisan ning siyudad human nigawas sa report sa Commission on Audit (COA) nga dunay kapalpakan sa pagpatuman niini.

Hisayran ang Sangguniang Panlungsod dunay gipatuman nga “guidelines” ubos sa SP Resolution No. 003-2012 o mas naila, “A Resolution Requiring All Prospective Contractors/Bidders to Submit Addition Requirements, as Hereunder Provided, for Eligibility Purposes Pending Approval of an Ordinance Aimed to Enhance the Procurement Process of Infrastructure Projects, and for Other Purposes.”

Katuyoan sa maong guidelines nga magamit sa sakto ang pundo nga gigahin sa panggamhanang lokal alang sa maong proyekto ug maseguro nga masunod ang “high standards” ug de kalidad nga proyekto.

Ang maong proyekto dunay Contract Amount nga P252,939,664.26 kansa mas ubos kon itandi sa pundong gigahin sa kagamhanang lokal ning siyudad balor P253,000,000.

Upat lamang ka mga patakaran ang gitakda sa Sangguniang Panlungsod alang sa pagpatuman sa mga proyekto nga dunay pundong gigahin balor P50 milyones pa taas.

Ang mo daug nga bidder, kinahanglan nga dunay nahuptang ISO 9000 Certification; DPWH Asphalt and Concrete Batching Plant Accreditation; DOLE Accredited Equipment Certificate of Inspection; ug TESDA Certification of Operators.

Sumala ni Butuan City Councilor Atty. Rema Burdeos, ang gitakdang patakaran sa Sangguniang Panlungsod angayan nga masunod sanglit dunay gipalabang nga Ordinansa alang sa implementasyon niini.

Dugang ni Burdeos, responsibilidad niya isip magbabalaud ning siyudad ang pagsusi kon nasunod ba ang gitakda nga mga patakaran, apan sa report sa COA, siya nadismaya.

Pinasikad sa Technical Evaluation Report for Infrastructure Project sa COA nga gi-aprubahan ni Service Chief State Auditor V Celso U. Reyes, wala nipasar ang winning bidder sa maong proyekto human nasuta nga wala kini nahuptan nga ISO certification; wala kini nahuptan nga sertipikasyon nga magpamatuod nga accredited kini sa DPWH; walay nahuptang Equipment Certificate of Inspection gikan sa DOLE; ug walay Certificate of Operators gikan sa TESDA.

Ang kwestyon lamang sa konsehal, nganong gitugot sa implementing agency nga ihatag ang maong proyekto ngadto sa winning bidder nga wala man kini nakasunod sa gitakda nga patakaran sa Sangguniang Panlungsod.

Tungod sa maong implementasyon, nagpakita lamang matod pa nga wala gitahod sa implementing agency ang “unanimously approved” nga ordinansa sa mga magbabalaud ning siyudad.

No comments:

Post a Comment