Gipangbangagan nga Kalsada Gireklamo

Ni Alex Mapoy

Gihimong pagbangag-bangag sa kalsada, delikado sa disgrasya.

BUTUAN CITY – Wala gikalipay sa pipila ka mga biyahidor o mga residente dinhe sa siyudad nga mag-agian sa Montilla Boulevard padulong sa Brgy. San Vicente tungod sa kangil-ad sa kalsada.

Nasuta nga dunay gihimong pag-repair sa nahisgutang kalsada diin ang pipila ka bahin niini ang gipangbangag-bangagan.

Ikalipay unta sa mga biyahidor ug mga residente ning siyudad nga regular nga mag-agian sa nasangpit nga kalsada sanglit kon mahuman ang gihimong pag-rehab sa kalsada, nindot naman unya kini nga pagaagian sa nagkadaiyang matang sa sakyanan sama sa motor.

Nakapait lamang sa gihimo sa contractor sa nahisgutang kalsada, igo lang gibangag-bangagan ang pipila ka bahin niini, gibiyaan, ug wala gani gibutangan og marking ang nahisgutang dapit nga kini “under repair o under construction.”

Alang ni Jun, usa ka motorista, delikado ang gihimo sa contractor nga gibangag-bangagan ang maong kalsada ug wala gani butangi og signage aron makabantay ang  driver sa sakyanan nga i-reduce ang dagan kay peligro ang maong dapit.

Hulagway sa kalsada nga gipangbangagan.

Pamugos ni Jun, angay unta butangan og signage ang maong dapit nga gipangbangag-bangagan aron walay mahitabong disgrasya sa naasoy’ng dapit.

Argumento pa sa nahisgutan, matumba man gani nang motor nga gamay lang bato ang maligsan, unsa pa kaha kanang kalsada nga gipangbangag-bangagan.

Dihang gisubay sa News Team ang maong kalsada, personal nga nasaksihan ang pipila ka bahin sa maong kalsada nga gipang-bangag-bangagan ug wala gani pangbutangi og signage aron makabantay ang motorista nga mo agi sa maong lugar.

Pangutana ni Jun, “kanus-a pa butangan sa contractor og signage ang maong dapit? Anha pa ba kini butangan kon dunay madisgrasya tungod sa ilang iresponsableng gihimo?”

Subay niini, naningkamot ang mantalaan nga mailhan ang contractor sa nahisgutang dapit aron ipaabot ang mulo sa katawhan sa ingon mabutangan og signage ang dapit nga ilang gipang-bangag-bangagan.