Loan Amnesty Dili All Time Ihanyag

Ni Alex Mapoy

Ang utang angayang bayran ug dili na hulatan nga mamultahan, tambag ni SSS Butuan Assistant Branch Head Arnold Pepino.

BUTUAN CITY – Gitin-aw sa kadumalahan sa Social Security System (SSS) Butuan nga dili sa tanang higayon ihanyag sa ahensya ang Loan Amnesty Program.

Sumala ni SSS Butuan Assistant Branch Head Arnold Pepino, ihanyag lamang ang maong programa kon dunay dagkong selebrasyon sa ahensya sama sa anibersaryo.

Dugang ni Pepino, kon sa higayon nga ihanyag ang maong programa, angayan nga pahimuslan kini sa mga membro nga dunay loan nga wala nabayran.

Kini nga programa ang kasagaran ihanyag ngadto sa gikonsiderang delinquent borrowers kinsang employer ang pakyas pag-remit sa loan payment sa membro ngadto sa buhatan, sa mga benepisyaryo sa namatay’ng membro nga dunay wala nabayran nga loan, ug sa mga membro nga mo file og retirement o kaha total disability claim sulod sa availment period.

Subay niini, gitambag sa opisyal ngadto sa mga membro nga dunay loan nga wala nabayran, angayan nga responsable kining mo bayad sa utang aron dili mapahamtangan og penalty.

Kadtong mga empleyado nga dunay loan sa buhatan, mas maayong regular usab kining mo susi kon na remit ba sa employer ang gibayad sa loan.

Ang loan matod pa sa opisyal kon dili mabayran sa gitakdang tagal ug kon mo lungtad kini sa pipila ka tuig nga dili mabayran, magkadako usab ang pagabayran niining multa hinungdan nga mintras sayo pa, bayran kini sa hingtungdan.