Pagpalapad sa Serbisyong Panglawas, Dakong Hagit - Bangues

Ni Alex Mapoy

Hagit sa kadumalahan ni RMN Butuan Manager Ramil Bangues ang pagpalapad sa serbisyong panglawas sunod tuig tungod sa pagdagsa sa mga nanginahanglan.

BUTUAN CITY – Subra libo ka mga Butuanon ug Agusanon ang nakapahimulos sa gipasiugdahan nga Medical and Dental Mission sa RMN DXBC Butuan sa Capitol Covered Court, Capitol Compound sakop ning siyudad kagahapon.

Gihimo ang maong kalihokan isip kabahin sa pagselebrar sa nahisgotang sibyahan sa ika-63 ka tuig nga anibersaryo sa katukoran.

Sumala ni RMN Butuan Manager Ramil Bangues, gihimo ang kalihokan isip kabahin sa station social responsibility ngadto sa katawhan.

Dugang ni Bangues, wala lamang nakatutok ang sibyahan sa paghatod sa mga lab-as nga balita ngadto sa tanang tigpaminawan, pagtuki sa mga nag-unang isyu sa  katilingban, ug paglingaw sa katawhan pinaagi sa manindot nga mga drama kondi lakip usab ang paghatag sa libre nga serbisyong panglawas.

Nakita sa mismong kadumalahan nga nanginahanglan ang katawhan sa serbisyong medikal labi na kadtong walay budget pagpakonsulta sa ilang gibati ngadto sa doktor ug usab pagpalit og tambal.

Tanan nga nahatagan og serbisyo ang pulos nakadawat sa libre nga tambal nga haum sa gihambin niining balatian.

Gitin-aw sa opisyal, tinuig ang maong kalihokan nga gihimo isip paagi sa sibyahan pagpaabot sa kinasingkasing niining pagpasalamat tungod sa padayong paghangop sa publiko sa tanang programa sa radyo.

Karon pa lang, nakita sa opisyal ang dakong hagit sa sunod tuig labi na sa pagpalapad sa paghatag sa maong serbisyo ngadto sa katawhan tungod sa pagdagsa sa mga nanginahanglan.

Nasayran nga isa ka libo lamang ang target beneficiaries sa maong kalihokan apan nisubra kini sa ilang gilauman.

Pipila sa mga libreng serbisyo nga napahimuslan sa mga benepisyaryo ang medical check-up, dental, libreng gupit, libreng masahe, mass feeding, libreng check-up sa mata ingon man eyeglass samtang ang uban nagdonar sa kaugalingong dugo.

Nahimong malamposon ang kalihokan tungod sa hugot nga suporta sa nagkadaiyang ahensya sa goberno, advertisers, civic group organizations, Philippine Red Cross, PNP, AFP, ug mining sector.