Seed Varieties Gibida

Ni Alex Mapoy

Gipangitaan og paagi sa ahensya sa agrikultura nga matabangan ang mga mag-uuma nunot sa pag-usab usab sa dagan sa panahon aron dili kini maalkansi.

BUTUAN CITY – Ubay – ubay na nga mga variety sa humay ang gibida sa Department of Agriculture (DA) Caraga ngadto sa mga mag-uuma ning rehiyon.

Gibida ang nahisgotang mga binhi sa humay ngadto sa mga mag-uuma atol sa gipahigayong School on the Air (SOA) on Rice and Climate Change sa isa ka FM Station sa lungsod sa Bunawan, Agusan del Sur.

Sumala ni DA Caraga Information Officer II Rhea Abao, ang gibida nga mga binhi mao ang mga klase nga makasugakod panahon sa huwaw.

Dugang ni Abao, ang dinaliang klase sa binhi (early maturity) mao ang klase sa binhi nga mahimong mabuhi bisan kulang ang patubig.

Pamugos sa opisyal, haum ang nahisgotang klase sa binhi sa ting-init ug kon kini maoy itanom sa mga mag-uuma, segurado nga dili kini maalkansi.

Pipila ka klase sa binhi nga gibida sa ahensya alang sa basakan mao ang National Seed Industry Council (NSIC) Rc192 nga nigawas adtong 2009; NSIC Rc272, NSIC Rc274, NSIC Rc276, NSIC Rc278, NSIC Rc280, NSIC Rc282, NSIC Rc284, NSIC Rc288 nga nigawas adtong 2011, NSIC Rc346 ug NSIC Rc348 nga pulos nigawas adtong 2013, ug daghan pang uban.

Sa irrigated area, puwede itanom ang PSB Rc10, PSB Rc134, ug NISC Rc222 samtang ang binhi sa humay nga puwedeng itanom sa mga lugar nga nagsalig lang og ulan mao ang PSB Rc14 ug PSB Rc68

Samtang sa banikanhan, gibida ang Philippine Seedboard (PSB) Rc80, PSB Rc9, ug PSB Rc23.

Ang maong klase sa mga binhi ang dako og ikatabang sa mga mag-uuma nunot ning pag-usab usab sa dagan sa panahon.