3 Probensya sa Caraga, Gideklarang Filariasis-Free

Ni Alex Mapoy

DOH Caraga Assistant Regional Director
Cesar C. Cassion

BUTUAN CITY – Tulo ka mga probensya sa rehiyon sa Caraga ang gideklara sa Department of Health (DOH) nga Filaria Free.

Gilangkoban kini sa Dinagat Island ug Agusan del Sur nga pulos gideklara adtong 2009 ug Surigao del Sur nga maoy pinakaulahing gideklara adtong 2013.

Bisan pa man, gipahayag ni DOH Caraga Assistant Regional Director Cesar C. Cassion, ang rehiyonal nga buhatan magpahigayon og Annual Mass Treatment.

Ang maong lakang pagahimuon, sumala ni Dr. Cassion nga salmotan sa katawhan aron masumpo ug mapatay sa hingpit ang “microscopic worms” ug makontrola usab ang mga lamok.

Gitin-aw ni Dr. Cassion, paagi usab kini nga makunhoran ang lebel sa microfilariae sa dugo sa ingon dili na kini makatakod pa sa ubang indibidwal.

Saad sa opisyal, dili mo hunong ang rehiyonal nga buhatan pagbatok sa maong sakit aron hingpit nang madeklara ang tibuok rehiyon nga Filariasis Free.

“The Annual Mass Treatment is an approach which involves the entire community in killing microscopic worms and controlling mosquitoes. This also reduces the level of microfilariae in the blood, hence, diminishes the transmission of infection. This is actually the global campaign to eliminate the disease. Prioritizing the vulnerable population, we will never stop our efforts to combat the disease until the entire region is declared free of such,” pagtin-aw ni Dr. Cassion.

Alayon niini, gidasig ang tanan sa pagtumar sa Diethylcarbamazine Citrate (DEC) ug Albendazole.

Ang Filariasis usa ka impeksyon nga mugna sa microscopic, thread-like worms nga gitawag og filarial worms. Mo takod ang maong sakit ngadto sa tawo pinaagi sa pinaakan sa infected nga lamok nga mo develop padulong pagka-adult worm sa lymphatic vessels.

Bati-on sa tawo nga duna niining sakita mao ang grabeng kangutngot, ug pagpanghubag sa tiil ingon man sa genital organs.