Pagtaas sa HIV Case, Gibatokan

Ni Alex Mapoy 

Makita ang skin lessions isip isa sa mga simtoma sa HIV/AIDS

BUTUAN CITY – Gipahugtan sa Department of Health (DOH) Caraga ang kampanya batok Human Immunodeficiency Virus (HIV) human padayon nga nagkataas ang ihap sa mga nataptan sa maong sakit.

Hisayran nga nipuwesto ang Caraga sa ikaduha sa mga rehiyon sa tibuok Pilipinas nga dunay pinakataas nga ihap sa mga indibiwal nga nataptan niini.

Sumala ni DOH Caraga Director IV Dr. Minerva P. Molon, alarming na ang maong sakit labi pa ang Pilipinas, na apil sa 9 ka mga nasod sa tibuok kalibotan nga paspas ang pagsaka sa kaso sa HIV samtang ang ubang mga nasod, nitala lamang kini sa consistent case o kaha niubos ang ihap sa mga nataptan.

Ang nahisgutang pamahayag ni Dr. Molon, gibase sa gipagawas nga report sa Global HIV/AIDS Global Response.

Dugang ni Dr. Molon, nagsilbing solusyon sa departamento sa panglawas ang pagpatuman sa 5^th AIDS Medium Term Plan nga gisugdan adtong 2011 ug matapos sa 2016.

Gihimo kini sa ahensya sa paninguha nga mapugngan ang pagkaylap sa HIV infection sa nasod ug pagkab-ot sa target goal nga “less than 66 HIV cases per 100,000 population” ug mapaubsan ang gidaghanon sa mga indibidwal, pamilya, o kaha grupo nga mataptan niini.

Ilawom sa maong plano, pipila ka mga interbensyon o programa ang gihimo aron mahatagan sa hingpit nga katumanan diin kon dili man ugaling mawagtang ang maong sakit, maubsan ang ihap nga mataptan niini.

Subay sa pagpahigayon sa HIV Counseling and Voluntary Testing Week, malaumon ang opisyal nga pinaagi niini, mas mapalapdan ang kahimatngon sa matag usa aron mas malikayan kining matanga sa sakit.