Distribusyon sa Abuno Natibawas

Ni Alex Mapoy 

PCA Caraga Acting Project Development Officer IV Grace Orilla.
Photo by Alex Mapoy

BUTUAN CITY – Hingpit nang natibawas ang pagpang-apud-apod sa liboan ka mga sakong abuno ngadto sa mga mag-uuma sa lubi ning rehiyon sa Caraga.

Ang nahisgutang alokasyon ang gikan pa kini sa tuig 2014 o sa nakalabay’ng tuig, apan, karon lamang kini nahuman sa pagpanghatag ngadto sa mga coco farmers.

Sumala ni Philippine Coconut Authority (PCA) Caraga Acting Project Development Officer IV Grace Orilla, ang nadawat nga mga abuno sa mga mag-uuma sa lubi ang libre kining gihatag.

Una nang gipasabot ni Orilla nga ang pag-abuno sa tinanom nga lubi ang dako kaayo og ikatabang nga mo buylo kini sa pagpamunga.

Ang lubi nga ma-abunohan ang lauman nga baga ang unod niini kon itandi sa wala na abunohan nga punoan.

Gihimo kini sa rehiyonal nga buhatan isip kabahin sa ilang pag-asdang sa adbokasiya nga makab-ot ang 25% nga usbaw sa produksyon sa lubi ning rehiyon.

Subay niini, malaumon ang opisyal nga sa sunod nga harvest, mas motaas ang produksyon sa lubi ning rehiyon.

Isip bunga sa programa, lauman usab nga mo taas ang kita sa mga coco farmers ning rehiyon tungod sa pagtaas unya sa produksyon.

Lauman usab sa tanang coco farmers ning rehiyon, pasalig sa opisyal nga dunay laing hugna sa pagpanghatag og abuno alang ning tuiga.

Sa pagkutlo niini nga balita, padayong gihikay ang gikinahanglang rekisitos aron subleng mahatagan og abuno ang mga nahisgutan kansang pundo gigahin alang niini nga tuig.