Halos P80-M Sub-Projects Ipatuman

Ni Alex Mapoy

DSWD Caraga Kalahi-CIDSS Regional Social Marketing 

Officer Eunice G. Montaos

BUTUAN CITY – Lauman nga mapahimuslan sa mga residente sa lima ka mga lungsod sa Agusan del Sur ang dul-an P80 milyones nga pundo alang sa pagpatuman sa Kapit-Bisig Laban sa Kahirapan-Comprehensive and Integrated Delivery of Social Services (Kalahi-CIDSS) nga programa sa  Department of Social Welfare and Development (DSWD) Caraga.

Basi sa datos, gigahinan sa ahensya sa kinatibuk-ang P79,797,950 alang sa katumanan sa nakahan-ay nga mga proyekto nga ipahiluna sa lima ka mga lungsod sa nasangpit nga probensya.

Sa kinatibuk-ang kantidad, ang P14,992,800 mapadulong sa lungsod sa Bunawan, P20,000,000 sa Prosperidad, P13,398,000 sa Rosario, P14,889,600 sa Talacogon, ug P16,517,550 sa Trento alang ning tuiga.

Ang nahisgutang mga lungsod maoy makapahimulos sa programa sa ahensya kontra kawad-on.

Sumala ni DSWD Caraga Kalahi-CIDSS Regional Social Marketing Officer Eunice G. Montaos, gipasabot ni Regional Director Minda B. Brigoli nga ang maong pundo gamiton sa pagtibawas sa “community sub-projects” gamit ang community-driven development (CDD) approach.

Dugang ni Brigoli, ilawom sa maong sistema, mopailawom sa Community Empowerment Activity Cycle (CEAC) ang benepisyaryong komunidad diin ang namuyo nga mga residente maoy magdesisyon kon unsa nga mga sub-projects nga mas ilang gikinahanglan ug sila mismo ang saligan sa pagdumala sa pundong gigahin alang sa napili niini nga mga proyekto.

Gawas nga nalambigit ang mga residente sa pagpatuman sa napiling proyekto, apil usab ang tanang local government units (LGUs) gikan sa barangay hangtod sa probensya sa proseso sanglit mohatag usab kini og counterpart o tugbang alang sa katumanan sa proyekto, pinansyal man o kaha materyales.

Nakita sa kadumalahan sa ahensya nga ilawom sa maong programa, gitagaan ang mga residente nga makasalmot pagplano o pagdesisyon sa gusto niini nga proyekto nga ipatuman sa tagsa-tagsa ka lugar diin ang pinakaunang gikonsidera mao ang interes sa kinabag-an ug ang proyekto nga pagahimuon, mapahimuslan sa tanan. 

Pipila sa mga proyekto nga mahimong padulngan sa gigahin nga pundo ang water systems, school buildings, health stations, day care centers, electrifications, foot bridges, pathways, access roads, pre-and post-harvest facilities, irrigation systems, flood control systems, environmental protection and conservation community projects.