Langyaw sa Kaugalingong Rehiyon, Likayan!

Ni Alex Mapoy

“Tourist spots sa Caraga, angayang bisitahon usab
sa mga Caraganons,” pagdasig ni DOT Caraga
Acting Marketing Officer Celia Valencia.

BUTUAN CITY – Daghan pa sa mga Caraganons ang wala nakasuroy sa gikonsiderang “tourist spots” ning rehiyon hangtod ning panahona.

Una nang gikomperma sa kadumalahan sa Department of Tourism (DOT) Caraga nga sikat na ang Caraga sa mga nasod nga na sakop sa kontinente sa Asya.

Bunga sa pagkasikat, daghang langyaw ang mo bisita sa mga nindot nga lugar ning rehiyon, apan, gi-angkon ni DOT Caraga Acting Marketing Officer Celia Valencia, bisan nagbalik-balik na ang mga langyaw paglulinghayaw sa mga nindot nga dapit ning rehiyon, daghan pa gihapon sa mga Caraganons ang wala nakagahin og panahon pagsuroy sa mga nindot nga dapit.

Pipila sa mga sikat nga kasuruyan sa rehiyon ang Tinuy-an Falls, Siargao Island, Bucas Grande Island, Agusan Marsh Wildlife Sanctuary, ug daghan pang uban.

Sumala ni Valencia, angayan nga ang mga Caraganons maoy una nga makadiskubre o makabisita sa mga nindot nga talan-awon ning rehiyon aron sa higayon nga kini makabisita sa laing rehiyon, makatubag kini kon dunay mangutana asa dapita sa Caraga ang nindot nga suruyan.

Dugang ni Valencia, mas nindot nga taga – Caraga ra usab ang magsilbing promoter sa kaugalingong lugar nga nindot suruyan ug salikwaot nga ang laing rehiyon maoy mag-indorso nga kini nga rehiyon ang dunay nindot nga mga dapit nga kasuruyan.

Pasabot sa opisyal, angayan nga magtinabangay ang mga Caraganons mo promote sa mga tourist spots ning rehiyon sanglit kon daghan ang mo indorso, matabangan nga mo kusog ang turismo ug niana, daghang imbestor ang maengganyo pagbubo sa ilang puhonan.

Alang sa opisyal, kon daghan imbestor ang mag-negosyo ning rehiyon, daghan usab nga trabaho ang mamugna ug masudlan sa mga Caraganons.

Tambag sa opisyal sa tanang Caraganons, “huwag maging dayuhan sa sariling rehiyon.”