Tree Planting vs El Niño Gihimo

Ni Alex Mapoy

Gilauman nga pinaagi sa pagtisok sa semilya sa kahoy,
ma-preserba ang kinaiyahan labi na ang tinubdan sa
tubig. Courtesy of BCWD

BUTUAN CITY – Gatosan ka mga batan-ong Butuanon ang nakig-alayon sa Butuan City Water District (BCWD) aron motabang pagbatok sa nasinatiang epekto sa mild El Niño Phenomenon dinhe sa dakbayan.

Hisayran nga padayon nga nagkaubos ang produksyon sa tubig nga makuha sa Taguibo river nga maoy gikonsumo sa liboang residente ning siyudad.

Matag adlaw, nagkaubos ang bultong tubig nga makuha sa watershed hinungdan nga nihimo og inisyatiba ang Usahag Bantay ang Kabuhatan (UBAN KA) pinaagi sa pagtisok sa 500 ka buok semilya sa kahoy diin 170 niini ang semilya sa nagkadaiyang klase sa prutas samtang 330 niini ang semilya sa nagkalain-laing klase sa kahoy.

Gipasabot ni BCWD Senior Public Relations Officer Ramil Barquin, ang UBAN KA, usa ka grupo sa mga batan-on nga gikan sa simbahang United Church of Christ in the Philippines (UCCP).

Dugang ni Barquin, ang UBAN KA, nag-asdang sa gihingusgan niini nga adbokasiya ang pagpanalipod, pagpreserba, ug pagkonserba sa kinaiyahan.

Gipakita kini sa grupo pinaagi sa pagtisok sa gatosan ka semilya sa kahoy kansa gilauman nga makatabang kini pagbatok sa epekto sa El Niño Phenomenon ug bisan sa El Niña Phenomenon latas sa katuigan.

Subay niini, gikalipay sa kadumalahan sa water district ang gipakitang kasibot sa kabatan-onan nga motabang pagpanalipod sa kinaiyahan aron ma-preserba ang tinubdan sa tubig nga maoy gigamit sa mga Butuanon sa adlaw nga tanan.

Nagmalamposon ang nahisgutang kalihokan pinaagi sa pagtinabangay sa BCWD ug sa UBAN KA aron matanom ang maong gidaghanon.

Magsilbi usab nga kabahin kini sa giluto nga mga “mitigating measures” sa water district aron malikayan ang posibleng worst scenario nunot sa epekto sa huwaw.

“Over a hundred youth from Usahag Bantay ang Kabuhatan (UBAN KA), a youth organization of the UCCP Church advocating the protection, preservation and conservation of the environment, is now undertaking tree growing activity this morning at the Taguibo Watershed. In coordination with BCWD, UBAN KA members are now planting 170 seedlings of fruit-bearing trees and 330 various endemic seedlings,” mensahe ni Barquin