Backyard Raising Apektado Na

Ni Alex Mapoy

Provincial Veterinarian Dr. Belen Aruelo.
Photo by Alex Mapoy

AGUSAN DEL NORTE – Apektado na ang binuhing kahayopan sa nasinatiang weak El Niño Phenomenon sa probensya sa Agusan del Norte.

Wala nalilong sa mga Agusanon ang daw mamahit nga kainit sa adlaw hinungdan nga kadtong mga binuhing hayop sa mga mag-uuma maoy na apektohan pag-ayo.

Gikabutyag ni Provincial Veterinarian Dr. Belen Aruelo, kasagaran sa mga na apektohan ang mga binuhing manok labi na ang mga piso.

Dugang ni Dr. Aruelo, wala kaayo naka-apekto ang kainit sa panahon ngadto sa mga dagkong hayop sanglit pabiling lunhaw o green pa ang kolor sa mga sagbot.

Gitin-aw sa opisyal, ang apektado kaayo mao kadtong mga mag-uuma nga nagtukod og gamay nga poultry labi na kadtong mga piso sanglit gikinahanglan pa kining sug-an aron mainitan.

Apan sa grabe ka init sa panahon, dili maka-agwanta ang mga piso hinungdan nga kini mangamatay gumikan kay walay ventilation nga makahatag bugnaw sa mga nahisgutan.

Dili maka-agwanta ang mga piso sa subra
ka init sa panahon.

“Ang affected gyud karon, kanang mga backyard raiser nato sa poultry, dali ra gyud mangamatay labi na ang broiler stage, kanang mga piso nga ginasug-an pa. Kuan kaayo sila sa kainit sa panahon. Kini lang sa backyard raising ang na apektohan kay kining commercial, naa man silay ventilation,” pahayag ni Dr. Aruelo.

Subay niini, gitambagan sa opisyal ang tanang mag-uuma nga dunay binuhi nga mga manok nga batasanon pagpainom og daghang tubig ang mga piso aron kini makasugakod sa kainit sa panahon.

Gawas niana, mas maayong hatagan kini og bitamina aron makasugakod sa subra kainit sa panahon.