Konsumidor Angayang Magdaginot

Ni Alex Mapoy

Gikabalak-an ang padayong pag-ubos sa lebel sa tubig sa watershed.
Courtesy of BCWD

BUTUAN CITY – Doble kayod ang gihimo sa Butuan City Water District (BCWD) human  padayong nikunhod ang water production gikan sa watershed tungod sa nasinatiang weak El Niño kapin isa ka bulan na ang nakalabay.

Tinguha sa kadumalahan ni BCWD General Manager Engr. Anselmo Sang Tian nga padayon niining mahatag ang de kalidad nga serbisyo ngadto sa mga konsumidor nga Butuanon.

Subay niini, hugot nga gibantayan sa water district ang tinubdan sa tubig ug gilatag na usab ang mga angayang pagabuhaton kon mo grabe pa ang maong epekto sa huwaw. 

Nasuta nga ang water district nagsalig lamang sa tubig nga nidagayday sa Taguibo river hinungdan nga gipangandaman ang mahimo pang epekto sa huwaw.

Sa impormasyon nga gipaabot ni BCWD Senior Public Relations Officer Ramil S. Barquin, kabahin sa gihimo niining pagpangandam ang pagpahigayon sa street-by-street leak detection and repair program, kampanya pagbatok sa illegal water connection, pagpagana sa 5 ka mga pumping stations isip backup sa tinubdan sa water district, pagseguro nga ang 6 ka mga reservoirs ang “sufficiently recharged,” operisyon sa booster pump nga nahimutang sa Km.6 Libertad aron maserbisyohan ang mga dapit nga nahimutang sa taas nga bahin sama sa Bancasi, Pinamanculan, ug Dumalagan, ug kon  mo grabe ang epekto, hinanaling ipatuman ang  “distribution management” pinaagi sa valving ug tanker rationing.

Gawas niana, gitambagan usab ni Barquin ang tanang konsumidor sa pagdaginot sa pagamit sa tubig.

Basi sa gihimong pagtuon sa Philippine Institute for Development Studies (PIDS) nga giuloha’g “Determination of Basic Household Requirements,” ang matag pamilyang Pilipino, duna kini average nga magamit nga tubig nga 6 ka litro matag adlaw alang sa pang-inom ug 12 ka litro alang sa pagluto ug uban pang gikinahanglan sa kusina. Kasagaran sa tubig nga gigamit sa matag panimay ang nagamit kini alang sa “personal hygiene” diin moabot kini og 68 ka litro kada adlaw ug 74 ka litro alang sa pagpanghinlo.

Alang sa opisyal, ang dakong bulto sa tubig nga magamit sa kada pamilya ang makunhoran kon magdaginot ang matag usa sa pagamit niini.

Gihingusgan sa water district ang pahimangno nga mas maayo minusan ang pagamit sa tubig ug kon mahimo, kadtong mga hinugas nga puwede pa ika-flushing sa inidoro, puwede kining gamiton.

Sa maong paagi, maminusan ang gikinahanglang tubig nga gamiton sa matag pamilya kada adlaw labi na nga inanay ang pag-ubos sa produksyon sa tubig sa watershed bunga sa epekto sa subra ka init sa panahon.