FMR Tulay sa Kalamboan

Ni Alex Mapoy

TURNOVER. Gipangunahan ni DA Asst Secretary  Edilberto De Luna ang pormal nga pag-turnover sa farm-to-market road sa dakbayan sa Bislig. Photo courtesy of DA Caraga Public Relations Officer II Aurelius P. Arais. 

SURIGAO DEL SUR – Gilauman nga magsilbing tulay sa kalamboan ang nagkadaiyang farm-to-market roads (FMRs) nga gipatuman sa kagamhanan.

Ang maong kalamboan mao unyay magtulay nga makab-ot sa hingpit ang gipangandoy sa tanan – ang kahapsay ug kalinaw.

Gikabutyag ni Agriculture Assistant Secretary (ASEC.)Edilberto De Luna, gisangonan ang ahensya sa Department of Agriculture (DA) sa gobernong Aquino pag-implementar sa FMRs labi na sa mga lugar nga padayon pang mabati ang kagubot.

Atol sa pagbisita ni Asec. De Luna ning rehiyon, nangunay kini pag-turnover sa multi-million nga FMR projects nga gipatuman sa rehiyonal nga ahensya sa agrikultura kansang pundo gikuha gikan sa Payapa at Masaganang Pamayanan (PAMANA).

Sumala ni DA Caraga Media Relations Officer Aurelius P. Arais, tanang FMR projects nga gitunol ni Asec. De Luna pulos konkreto ug nagbalor P166.5 milyones.

Gilangkoban kini sa 2.41 kilometros nga kalsada sa San Roque, Cadanglasan FMR sa Sitio Mabog, San Roque, Bislig City nga maoy nagkutay sa utlanang bahin sa lungsod sa Bunawan nga nagbalor P33.3 milyones; 5.42 kilometros nga FMR sa Km. 16, Barangay Diatagon lungsod sa Lianga partikular na sa Sitio Lagangan, Caras-an- Tago FMR nga nagkantidad og P66.6 milyones; ug 5.29 kilometros nga sementadong kalsada sa Brgy. Lubo, Cantilan-Brgy. Panikian, Carrascal FMR nga nagkantidad og P66.6 milyones.

Gipasabot ni Asec. De Luna, padayon ang ahensya nga nagpaluyo sa kagamhanang Aquino labi na sa hisgotanang pagpalambo sa ekonomiya, pagkab-ot sa matood nga hustisya, ug hingpit nga kalinaw.

Hugot nga nagtuo ang opisyal nga ang pagsulbad sa kagubot, wala lamang kini naglimita sa paggamit og armas, hinono-a, mahimo usab kining sulbaron pinaagi sa paghatag sa nagkadaiyang ekonomikanhong oportunidad.

Alayon niini, kinasingkasing nga nagpaabot og pagpasalamat si Surigao del Sur PAMANA focal person Engineer Merlinda Baure kinsa maoy nagrepresentar kang Governor Johnny Pimentel sa kontribusyon sa ahensya sa hisgotanang pagpalambo sa probensya.