5.7M Mangrove Propagules Natanom

Ni Alex Mapoy

PLANTING. Gipakusgan  ni DENR Caraga RD Nonito M. Tamayo ang pagpatuman sa Mangrove and Beach Forest Development Project ning rehiyon. Photo courtesy of Eric Gallego

BUTUAN CITY – Milyones na ka mga mangrove propagules ang natanom sa Department of Environment and Natural Resources (DENR) Caraga sa nagkadaiyang baybayon ning rehiyon.

Ilawom sa Mangrove and Beach Forest Development Project (MBFDP) nga gipatuman sa nasangpit nga ahensya, mokabat na sa 5,706,452 ka mga mangrove propagules ang natanom katumbas sa 4,452 ka ektaryang luna nga nahimutang sa baybayong bahin sa Agusan del Norte, Surigao del Nore , Surigao del Sur, ug Dinagat Province.

Ang maong ihap, lagpas na sa katunga sa kinatibuk-ang target nga 11,130,000 butang nga gikalipay sa rehiyonal niini nga buhatan.

Sa impormasyon ni DENR Caraga Communication and Development Office Supervisor Eric Gallego, target sa rehiyonal nga buhatan nga adiser moabot ang bulan sa Disyembre, mahuman na pagtanom ang nahibiling mga semilya sa mangrove aron makompleto ang kinatibuk-an niining target nga matisok.

Gikomperma usab ni DENR Caraga Regional Director Nonito M. Tamayo nga ang tanang membro sa nagkadaiyang Community-Based Forest Management Organizations ang nag-ayo sa tagsa-tagsa ka pundohanan og tubig.

Tuyo niini nga makatigom sa bultong tubig nga maoy ibisbis sa natanom nga mga semilya sa bakhaw o mangrove isip pagseguro nga kini mabuhi.

Pinaagi usab sa Cash for Work program sa Natonal Greening Program (NGP), nang-hire ang ahensya og 2,120 ka mga indibidwal aron maoy mag-atiman sa nursery ug magbantay sa mga seedling.