Komunista Nagdalag Kagubot

Ni Alex Mapoy

BUTUAN CITY – Gi-alegahan ang Partidong Komunista nga maoy maghatag gubot sa mga lugar nga masudlan.

Butyag ni Julieto P. Canoy, alias Ka Boom, basta nay rebelde sa lugar, lauman na lamang sa katawhan nga dunay kagubot nga mahitabo.

Dugang ni Ka Boom, mangita og paagi ang mga rebelde aron makakuha kini og simpatiya sa katawhan hinungdan nga magmugna kini og senaryo.

Sa asoy usab ni Amado Zata, isa ka yanong mag-uuma, dihang nakasulod siya sa Sitio Rock Island sakop sa lungsod sa Bunawan Agusan del Sur niadto aron magtikad og yuta, malinawon pa kaayo matod pa ang maong dapit.

Dugang ni Zata, dihang gisudlan og komunista ang maong lugar, gihangop kini sa katawhan sanglit nagpatuo kini nga maayo, apan pagligid sa panahon, nigawas na ang dili maayo niining pagdumala kanila.

Kadtong mga mag-uuma matod pa nga mo supak sa balaud sa komunista, kinahanglan kining mo layas aron dili kini patyon sa mga rebelde.

Ang kasinatian ni Zata gipadayag atol pakigtagbo ngadto sa mga media practitioners ning siyudad.

“Nagpatuo ang komunista nga mga maayo, apan pagdagan sa panahon, dili na maayo ang pagdumala nila mao sa hinayhinay, nigawas ko sa teritoryo samtang wala pa ako gipalayas. Ang mga mag-uuma diha kon dili mo sunod sa ilang balaud, kinahanglang mo layas, kay kon dili mo layas, ilaha kang tumbahon,” pahayag ni Zata.