Water District Gitambagan

Ni Alex Mapoy

WAY HUGAS. Kalbaryo sa mga namuyo sa taas nga lugar o tumoy’ng bahin sa water district sanglit mismo plato ang dili mahugasan tungod sa kawalay tubig.    

BUTUAN CITY – Pipila ka mga konsumidor sa Butuan City Water District (BCWD) ang nipasibaw sa ilang tambag ug suhistyon kon unsay angayang buhaton sa water district higayong masinatian ang subsob nga mga pag-ulan sa siyudad.

Hisayran nga kon sagunson ang ulan, pinaka-makaluluoy nga mga konsumidor sa water district mao kadtong nanimuyo sa mga dapit nga nahimutang sa taas nga lugar ug sa tumoy’ng bahin sa area of coverage sanglit bisan isa ka tulo sa tubig maglisod pag-agas.

Gikabutyag ni Inday Lucy, isa ka tindera nagsugyot nga angay buhaton sa water district kon magsige ang ulan, awtomatiko unta kining magpahigayon og water rationing bisan lang og ipaagi sa valving aron kadtong mga namuyo sa taas nga lugar ug sa tumoy nga lugar makatubig mintras gi-shutdown ang pasilidad sa watershed area.

Kahibaloan nga sa matag higayon nga i-shutdown ang pasilidad sa watershed area, awtomatiko nga ipa-aktibo sa water district ang 5 ka mga pumping stations aron makatubig ang sentrong bahin ning siyudad.

Ang sugyot ni Inday Lucy, miani og suporta gikan ni Dodong Boy, isa ka traysikol drayber diin alang kaniya, mas maayo unta nga mag-valving rationing aron usab makatubig kadtong mga lagyo.

Pamugos ni Dodong Boy, ang mga tawo sa sentrong bahin sa siyudad ug kadtong namuyo sa taas nga lugar ug tumoy’ng bahin sa service area walay kalainan sanglit pareho matod pa kini mga konsumidor sa water district ug pulos dunay minimum nga pagabayran.

Alang usab kang Bobby, isa ka lechonero, mas maayong ipatas sa water district ang paghatag serbisyo panahon sa ting-ulan.

Kon dili matod pa ni Bobby kayang suplayan sa 5 ka mga pumping stations ang tibuok service area, mag-schedule ang water district og water valving rationing aron dili lang ang sentrong bahin sa siyudad ang makatubig.

Sa obserbasyon ni Dodong Badoy, isa ka magbabasak, panahon sa ting-ulan ang mga namuyo lang sa sentrong bahin sa siyudad maoy makaligo sanglit duna man kini suplay sa tubig samtang kadtong namuyo sa taas nga lugar ug tumoy nga bahin, mo sulod sa trabaho nga wala intawon kini ligo

Alang sa mga nahisgotan, kanunay silang nisabot nga dili 24/7 ang serbisyo sa water district panahon sa ting-ulan, apan unta matod pa, himoong patas ang paghatag serbisyo ngadto sa tanang konsumidor kon masinatian ang maong panahon.