Bultong Basura Nakuha sa Baybayon

Ni Alex Mapoy

AGUSAN DEL NORTE – Bulto nga mga basura nga dili malata ang nakuha sa kapin gatos ka mga indibidwal kinsa nagpahigayon sa pagpanghinlo sa kabaybayonan sa probensya.

Kasagaran sa mga nakuhang basura mao ang rubber sandals, tsinelas, plastic bottles, plastic wrappers, straws, botelya sa bino ug daghan pang uban.

Sumala ni DENR Caraga Communication and Development Office Supervisor Eric Gallego, gihimo ang pagpanghinlo sa baybayong bahin sa Barangay Bolihon, Carmen sakop sa maong probensya.

Dugang ni Gallego, gisalmotan ang kalihokan sa nagkadaiyang grupo sa pagpanguna sa Department of Environment and Natural Resources (DENR) Caraga uban sa pag-abag sa lokal nga panggamhanan sa mga lungsod sa Carmen ug Nasipit.

Nanghinaut sila Nasipit CENR Officer Norman Asugan ug Agusan del Norte PENRO Paterno Olivares nga mohimo og inisyatiba ang mga residente aron mapanalipdan ang kadagatan pinaagi sa makanunayong pagpanghinlo sa baybayon ug likayan ang pagpanglabay sa mga basura.

Gitin-aw sa opisyal, ang pagpanghinlo sa kabaybayonan maghimong hinlo ug himsog nga kadagatan.

Ang mga basura nga giila lamang nga simple sa katawhan, nahimong hagit sa tanan sanglit naghatag kini og kadaut sa kadagatan labi na sa mga itloganan sa isda.