TechVoc Teachers In-Demand

Ni Alex Mapoy

IN-DEMAND. Kulang ang Caraga og Technical Vocational Teachers nga magtudlo sa umaabot nga Senior High School hinungdan nga gidasig ni TESDA Caraga Regional Director Florencio Sunico, Jr. kadtong indibidwal nga magkuha sa kursong Vocational aron makatabang pagtudlo sa TechVoc nga kurso.

BUTUAN CITY – Pinangita karon ang Technical Vocational (TechVoc) Teachers sa rehiyon sa Caraga tungod sa nakaung-ong nga pagpatuman sa K-12 Program sa Department of Education (DepEd) sunod tuig.

Sumala ni Technical Education and Skills Development Authority (TESDA) Caraga Regional Director Florencio Sunico, Jr. gamay lamang nga TechVoc Teachers ang makatudlo sa Technical Vocational Course ngadto sa umaabot nga Senior High School hinungdan nga mas nanginahanglan kini og dugang pa nga makatudlo.

Dugang ni Dir. Sunico, kahigayon kini nga angay dili palabyon niadtong nangita og trabaho labi na niadtong nagkuha sa kursong edukasyon, apan hangtod karon, wala pa nagamit ang maon propesyon human wala nakasulod sa DepEd.

Gitin-aw usab sa direktor, dili lang kadtong nakakuha sa kursong edukasyon ang puwede nga makatudlo kundi lakip na kadtong mga indibidwal nga nakahupot og National Certificate (NC) sa bisan asa nga field sa TechVoc Courses.

Wala hinuon gidetalye sa opisyal kun unsa nga lebel sa NC ang puwede makatudlo ngadto sa Senior High School.

Sa ingon matod pa sa opisyal nga makatudlo ug makasulod sa disenteng trabaho, mas maayo nga karon pa lang, mo kuha na og TechVoc nga kurso aron kon mahuman sa training ug mo pasar sa assessment, makahupot na dayon kini og sertipiko gikan sa rehiyonal nga buhatan.