Ginansya Gipalabi; Benepisyo Gikalimtan

Ni Alex Mapoy

NLRC Caraga Administrative Officer V Robert M. Aying

BUTUAN CITY – Ginansya lamang ang gitan-aw sa mayorya nga negosyanteng employer hinungdan nga mapasagdan ang interes sa mga empleyado.

Lantaw kini sa liderato sa National Labor Relations Commission (NLRC) Caraga human walay ni bisan isa man lang ka bulan nga natala nga wala kini nakadawat og reklamo batok sa ni bisan kinsa nga employer.

Gikabutyag ni NLRC Caraga Administrative Officer V Robert M. Aying, tungod sa pagka-mapasagaron sa mga employer sa interes sa tanan niining empleyado, pipila ka mga benepisyo nga angay i-remit ngadto sa hingtungdang ahensya sa goberno sama sa Social Security System (SSS), Pag-Ibig, ug PhilHealth ang nakalimtan.

Dugang ni Aying, walay laing gihunahuna sa employer kondi unsaon nga mo ginansya ang gitukod niining negosyo.

Alang sa opisyal, normal lamang sa negosyante nga ang hunahunaon unsaon nga mo ginansya ang gibubo niining puhonan sanglit usa kini ka negosyo.

Apan, dili usab angayan nga pasagdan o kalimtan sa employer ang benepisyo nga angay madawat sa mga empleyado sanglit ang kalamposan sa usa ka pamatigayon, nag-agad sa paningkamot sa mga trabahante.

Pamugos sa opisyal, dili mo kita o molambo ang negosyo kon ang trabahante gihikawan sa iyang agalon o amo sa mga benepisyo sanglit ang mga nahisgotan walay kadasig nga mo trabaho gumikan kay wala kini nahatagan sa saktong kompensasyon isip empleyado.

Alayon niini, nalantawan sa opisyal nga magpadayon ang ihap sa mga empleyado nga mahikawan sa saktong benepisyo kon magpadayon ang maong matang sa kinaiya sa employer kansang kaugalingong kabuhong maoy gilantaw.