Fortun Nihangyo sa Tanang Kandidato

Ni Alex Mapoy

Agusan del Norte First District Congressman
Lawrence Fortun

BUTUAN CITY – Niapela ang kongresista sa Agusan del Norte sa tanang magpapili sa umaabot nga piliay nga hatagan sa saktong impormasyon ang katawhan ug dili hatagan sa mga bakak nga kasayoran.

Ang apela sa magbabalaud gihimo pipila ka adlaw adiser moabot ang mga adlaw’ng gitakda sa Commission on Election (Comelec) ngadto sa tanang molansad pagduso sa opisyal niining certificate of candidacy (CoC).

Hisayran nga bisan wala pa ang campaign period, nagsugod na ang mga tigpamaba sa mga pulitiko pagsabwag sa mga bakak nga kasayoran ug hag-as nga pagpangdaut ngadto sa kaatbang sa pulitika.

Sumala ni Agusan del Norte First District Congressman Lawrence Fortun, dakong sayop ang maong sistema sanglit ang pagbuhat sa ingon, sama ra nga gilingla sa mga pulitiko ang katawhan aron dili makapili og sakto sa mga kandidato nga angay unta ibutang sa puwesto.

Gipasabot ni Cong. Fortun, ang pulitika usa ka ehersisyo diin ang katawhan mahatagan og higayon sa pagpili og mga kandidato.

Dili matod pa kini panahon sa pagdinautay sa kaatbang sa pulitika ug labaw na nga dili kini usa ka “exercise” nga ilaron ang mga botante.

Alayon niini, naghangyo ang magbabalaud sa tanang pulitiko nga hatagan sa tukma nga impormasyon ang botante aron kini magiyahan kon kinsa ang angayan nga mamahimong lider sa katilingban.

“Mga kaigsuonan, kining pulitika, usa kini ka ehersisyo diin ang atong katawhan, matagaan og higayon para sa pagpili og mga kandidato. Dili ni siya usa ka ehersisyo, para magdinautay. Dili ni usa ka ehersisyo para linglahon nato ang katawhan. This is an exercise that we give to our people an opportunity to be able to choose from among leaders nga nag-representar kon kinsa ang angayan. So, akong gihangyo, tagaan nato og igong impormasyon ang atong katawhan,” hangyo ni Cong. Fortun.