Monthly Remittance Angay Susihon

Ni Alex Mapoy

Transaksyon sulod sa Social Security System (SSS) Butuan. 

BUTUAN CITY – Gidasig ang tanang membro sa Social Security System (SSS) nga angayang regular nga susihon ang monthly remittance.

Sumala ni SSS Butuan Assistant Branch Head Arnold Pepino, mas maayo nga regular kining mo susi sa monthly remittance isip pagseguro nga na remit sa employer ang binulan niining bayad.

Dugang ni Pepino, kasagaraan sa nahitabo niadtong membro sa buhatan, ayha na mo susi kon mag-claim sa benepisyo nga angay mapahimuslan isip membro.

Sa maong kinaiya, ayha ra usab kini masayod nga wala na remit ang binulang bayad, swerte na lang niadtong membro nga ang employer magtinundo paghimo sa ilang obligasyon pag-remit sa kontribusyon.

Pamugos sa opisyal, dili lang ang employer ang dunay obligasyon pagsusi sa kontribusyon sa empleyado kondi ang hingtungdan mismo sanglit ang kaugmaon niini maoy nakataya.

Giklaro sa opisyal, kon magpasagad ang membro bahin sa binulang kontribusyon, kon ugaling kini madisgrasya, dako na hinuon ang problema labi na niadtong kontribusyon sa membro nga wala gi-remit sa amo sanglit maglisod kini pag-avail sa benepisyo nga angay unta niini mapahimuslan.

Alang sa opisyal, dili dautan kon ang membro maghikuta sa binulang remittance sanglit kada bulan kini nga gikaltasan sa amo ug katungod usab niini ang masayod bahin sa kaugalingong kontribusyon.