Eskwelahan Gibisita sa LWUA

Ni Alex Mapoy

BCWD Senior Public Relations Officer Ramil S. Barquin

BUTUAN CITY – Duha ka eskwelahan sa dakbayan sa Butuan ang gibisita sa mga kadagkoang opisyal sa Local Water Utilities Administration (LWUA) Buhay KYUT program.

Gilangkoban kini sa Riverside Central Elementary School ug Riverside Integrated High School.

Sumala ni Butuan City Water District (BCWD) Senior Public Relations Officer Ramil S. Barquin, nakabisita ang LWUA sa nahisgotang mga tunghaan human niuban kini sa water district sa gipahigayong Bisita Eskwela.

Ang pag-uban ug pagbisita sa LWUA kabahin kini sa pagselebrar sa ika-42 ka tuig nga anibersaryo sa katukoran.

Dugang ni Barquin, nanghatag ang LWU ug BCWD sa nagkadaiyang health ug hygience kits sa mga magtutungha sa nahisgotang mga tunghaan.

Gipasabot sa opisyal, ang Buhay KYUT nagtimaan nga Kalusugang Yaman Ugnay sa Tubig.

Ang maong programa, gimugna sa LWUA isip kabahin sa gipahugtang kampanya nga water conservation, health, hygiene, wastewater management ug waste recycling.

Gipatuman ang programa sa maong ahensya pinaagi sa ilang Public Affairs Department uban sa pag-abag sa “identified water districts,” Department of Health (DOH), Department of Education (DepEd), Local Government Units (LGUs), ug Department of Environment and Natural Resources (DENR).

Katuyoan sa programa mao ang pagmatuto sa mga membro sa pamilya ang kinaiya pagkonserba sa tubig sa panimay, paghugas sa mga kamot adiser ug paghuman pagkaon, paghugas sa kamot adiser ug paghuman sa pagluto, pagpanglimpiyo sa panimay, saktong paglabay sa basura, ug pagkat-on kabahin sa mga kaayohang makuha sa waste recycling diin mokita ang pamilya.

Ang Bisita Eskwela usa ka quarterly nga kalihokan sa water district diin ang mga tunghaan sa elementarya ug sekondarya ang nilawas nga gibisita.