Bagani Walay Salig sa Goberno

Ni Alex Mapoy

BUTUAN CITY – Gitumbok nga ang kawalay salig sa membro sa Bagani ngadto sa goberno maoy hinungdan nganong wala kini hingpit nga ni-surrender sa kagamhanan.

Sumala ni Caleb Lanaban, naila sa kalihokan nga Ka Ryan, kanhi Platoon Commander sa Militia ng Bayan sa Sitio Greenfield, Santa Juana, Tagbina, Surigao del Sur, dihang nisampa sila sa kalihokan, gihiloan ang ilang hunahuna sa nag-organisa kanila nga kon sila madakpan sa militar, sila pagadagmalan ug pagapatyon hinungdan nga natanom sa ilang hunahuna nga dili angayang saligan ang goberno.

Kini ang hinungdan, dugang ni Lanaban nga ang kanhi membro sa NPA, nagtukod og grupo nga Bagani Forces ug gigamit ang dalang armas gikan sa walhong kalihokan aron batokan ang mga rebelde uban sa panghinaut nga maangkon ang kalinaw sa ilang komunidad.

Gitin-aw ni Lanaban, ang rebelde maoy nagsabwag kagubot sa komunidad sa mga lumad hinungdan kadtong nahigmata, nibuwag ug nakigbatok sa armadong pakigbisog, apan wala kini ni-surrender sa awtoridad aron ilhong legal nga mga rebel returnees sanglit nawad-an usab kini og pagsalig sa goberno.

Aminado ang nauwahi nga ang gihimo sa Bagani Forces labi na paghupot og armas, usa ka illegal nga buhat.

Pamugos usab sa nauwahi, human nawad-an og paglaum ang mga membro sa Bagani Forces, nag-magahat kini o nag-huramentado hinungdan nga gipangpatay kadtong nailhang rebelde.

“Kon madakpan kamo sa kasundalohan, pagapatyon, paga-turtyuron gyud kamo. Mao na nga kadtong wala naka-surrender sa atong kasundalohan, nahitabo nga nagbitbit gihapon siya og pusil aron ilang idepensa sa ilang kaugalingon. Mao na ang nagahitabo. Murag wala na silay kapaingnan. Murag naghuramentado na sila sa pagkakaron. Wala silay giingon nga nagpailalom sa partidong komunista sa Pilipinas ug wala usab sila nagpailalom sa pang-goberno sa Republika sa Pilipinas. Illegal gyud siya,” pagklaro ni Lanaban.

Bunga sa paghuramentado sa Bagani Forces, gipatay sila Malahutayong Pakigbisog Alang sa Sumusunod (MAPASU) Lider Dionel Campos ug Aurelio Sinzo kinsa matod pa ni Arthur Tariman, convenor sa Victims of Injustice, Criminality & Terrorism in Mindanao (VICTIM), mga notadong rebelde nga nakatakda na untang mo surrender sa goberno, apan, napatay sa membro sa Bagani Forces.

Gilakip usab matod pa si Alternative Learning Center for Agricultural and Livelihood Development (ALCADEV) Executive Director Emerito Samarca pagpatay sa mga naghuramentadong membro sa Bagani Forces sanglit basi sa nadungog ni Tariman, si Samarca giila nga dakong kagaw nga nihilo sa panghunahuna sa kabataang lumad.