Mid-Autumn Festival Gisaulog

Ni Alex Mapoy

BUTUAN CITY – Simple, apan puno sa kamaya ang mga Filipino Chinese nga nagtigom aron saulogon ang Mid-Autumn Festival diha sa Big Daddy Hotel and Convention Center sa dalang J.C Aquino ning siyudad sa Butuan adtong Sabado sa gabii.

Ang Mid-Autumn Festival sagad saulogon sa mga Intsek sa ika-walo nga bulan sa Chinese calendar ug kini mao ang bulan sa Septembre kon basihan ang Gregorian calendar.

Ning tuiga, ang mga Intsek dunay duha ka adlaw nga public holiday ang Septembre 26 ug 27.

Pinasikad sa Chinese lunar calendar, ang ika-walo nga bulan mao ang ika-duha nga bulan sa autumn.

Gihulagway sa mga Intsek nga ang buwan sa matag bulan, anaa sa pinakalingin, pinakahayag, ug nagsimbolo sa panaghiusa o panag-uban sa Chinese culture.

Ang gihimong selebrasyon nagtimaan nga panahon na sa ting-ani sa tinanom nga humay ug pagyukbo sa gituohan niining bathala aron ipadayag ang ilang kinasingkasing nga pagpasalamat tungod sa daghang grasya nga ilang nadawat.

Isip kabahin sa selebrasyon, naghinatagay ang grupo og gasa ngadto sa kaubanang Filipino Chinese isip pagpadayag sa ilang tim-os nga pakigdait.

Gitambongan ang kalihokan sa tanang membro sa Filipino Chinese Amity Club Butuan Branch kuyog ang tagsa-tagsa niini ka mga pamilya.