Contractual Employees Kuyanap

Ni Alex Mapoy

CONTRACTUALIZATION. Tungod sa kawalay igong oportunidad sa panarbaho, gikomperma ni DOLE Caraga Regional Director Atty. Johnson Cañete, CESO III nga ilang gitugot ang maong sistema.

BUTUAN CITY – Gikomperma sa kadumalahan sa Department of Labor and Employment (DOLE) Caraga nga kuyanap ang kontraktwalisasyon ning rehiyon.

Sumala ni DOLE Caraga Regional Director Atty. Johnson Cañete, CESO III, nidaghan ang mga kontraktwal nga empleyado sanglit ilang gitugot ang sub-contracting.

Dugang ni Cañete, bisan sa gobernong buhatan, gitugot ang maong sistema sa katarungan nga wala nay igong oportunidad nga kasudlan ang mga Caraganon.

Gihimo pang ehemplo sa direktor nga bisan sa ilang rehiyonal nga buhatan, nagkuha na og sub-contractor nga janitor.

Bisan matod pa sa gawas sa nasod, ang mga Overseas Filipino Workers (OFWs) nag-sub-contracting diin pipila kanila matod pa nagtrabaho isip cashier, 2 ka oras; paggawas, nisulod pagka-tindera, 2 ka oras; paghuman, nisulod pagkamanilhigay sa kalsada, 2 ka oras; ug daghan pang uban.

Nahitabo kini sanglit na usab na ang dagan sa kalibotan sa panarbaho hinungdan nga ila kining gitugot nga sistema dinhe sa nasod.

“Nganong nidaghan? Tungod kay we now allow sub-contracting. Kay even the government, nag-allow.  Mao nang nikaylap ang sub-contracting. Nag-change in the world of work. And, we are also allowed that it happens in our country tungod kay wala namay oportunidad,” pagkomperma ni RD Cañete.

Alayon niini, estriktong gipatuman ang mga palisiya sa sub-contracting sa ingon walay interes sa contractual employees ang mayatakan.

“We are strictly implementing the rules and regulations sa sub-contracting. Unsa man? Sakto ang capitalization. Sakto ang pundo.  Sakto sa social services ang mga gi-sub-contract nga mga empleyado,”pagtin-aw sa direktor.