Caraga No. 3 sa Illegal Drug Users

Ni Alex Mapoy 

Dr. Julie Martinez sa CHED Caraga nidasig sa tanang ginikanan nga bantayan ang mga anak ug batokan ang drugas. Photo by Mike Glenn Obungen

BUTUAN CITY – Gika-alarma sa Commission on Higher Education (CHED) Caraga ang pinakaulahing survey nga nigawas diin ang rehiyon sa Caraga maoy ika-numero 3 sa pinakadaghang gumagamit og drugas sa tibuok nasod.

Sumala ni Dr. Julie Martinez sa CHED Caraga, sa kinatibuk-ang 16 ka mga rehiyon sa nasod, ang rehiyon pa sa Caraga maoy ikatulo sa pinakadaghan sa tigamitan sa drugas.

Dugang ni Dr. Martinez, ang maong resulta sa survey, dili kini angayan nga i-marka bahala lang kondi angayan kining batokan.

Gi-awhag usab sa opisyal ang tanang ginikanan nga dili pasagdan ang mga anak aron dili kini masugamak sa bisyo nga makapatay sa nindot nga kaugmaon sa bata.

“Very alarming. Out of 16 regions, No. 3 ang Caraga sa pinakamaraming users sa illegal drugs. Dapat di natin pabayaan ang ating mga anak,” pahayag ni Dr. MartinezIgherHigher b

Subay niini, gihingusgan sa komisyon ang kampanya nga Study, Transform, Organize, and Pray (STOP) kansang paagi maoy nakita nga pinaka-epektibo nga pang-alkontra aron ang kabatan-onan dili magpakabuang sa dautang bisyo.

Ang nasangpit nga survey, gipamatud-an sa nanglabay nga mga operisyon nga gihimo sa awtoridad diin bulto-bulto nga shabu nga nagkantidad og milyones pesos ang nakompiska sa pipila ka bahin ning rehiyon.

Pinakaulahing operisyon nga gilusad sa Philippine Drug Enforcement Agency (PDEA) Caraga ang pagkasakmit sa ¼ kilo nga shabu nga nagbalor og P2.1 milyones diha sa Magsaysay Bridge ning siyudad sa Butuan.

Bisan pa man, naningkamot ang hingtungdang ahensya sa kagamhanan nga mabatokan ug madakpan ang mga nagpayuhot og drugas aron wala nay kaugmaon sa kabatan-onan ang madaut.