Usbaw sa Matrikula Laumang Aprubahan

Ni Alex Mapoy

CHED Caraga Chief Education Program Specialist Engr. Ramil A.
Sanchez. Photo by Alex Mapoy

BUTUAN CITY – Gilauman nga ma-aprubahan ang apela sa walo ka mga tunghaan sa kolehiyo o unibersidad ning rehiyon sa Caraga ang pag-usbaw sa tuition fee.

Sumala ni Commission on Higher Education (CHED) Caraga Chief Education Program Specialist Engr. Ramil A. Sanchez, sa rehiyonal nga lebel sa komisyon, aprubado na ang maong petisyon, apan, ang dunay full authority nga mag-apruba sa nasangpit nga hangyo mao ang CHED Central Office.

Dugang ni Engr. Sanchez, tanan nga rekisitos nga gipangayo sa CHED Caraga ngadto sa walo ka mga tunghaan ang na “comply.”

Gitin-aw sa opisyal, ang orihinal nga nag-apply og tuition fee increase dinhe sa rehiyon ang mokabat sa 12 ka buok, apan nabasura ang petisyon sa upat ka mga tunghaan sanglit wala kini ka apas sa deadline nga gihatag sa pagsumite sa gikinahanglan nga mga rekisitos.

Subay niini, walo lamang ka mga petisyon ang napaabot ngadto sa CHED Central Office. Ang walo naglangkob sa Agusan del Sur College, Inc.; Asian College Foundation (ACF); Elisa R. Ochoa Memorial Northern Mindanao School of Midwifery (EROMNMSM); Saint Joseph Institute of Technology (SJIT); Saint Paul University Surigao; Father Saturnino Urios University; ug Surigao Education Center; ug STI College – Surigao.

Sa walo ka mga tunghaan, dili pareha ang ipatumang increase sa tuition fee sa mga nahisgutan.

Basi sa datos, 4.38% ang i-usbaw sa tuition sa Agusan del Sur College, Inc.; 4.38% sa Asian College Foundation (ACF); 4.38% sa Elisa R. Ochoa Memorial Northern Mindanao School of Midwifery (EROMNMSM); 4.38% sa Saint Joseph Institute of Technology (SJIT); 25.00% sa Saint Paul University Surigao; 5.00% sa Father Saturnino Urios University; 12.52% sa Surigao Education Center; ug 4.38% sa STI College – Surigao.

Sa higayon nga ma-aprubahan ang nahisgutang petisyon sa CHED Central Office, lauman nga lain na usab kining palas-anon sa mga estudyante labi na sa ginikanan nga ubos ang kahimtang sa panginabuhian.