Damyos sa Huwaw, Gamay Lang – PhilRice Agusan

Ni Alex Mapoy

Pananom nga humay nakalusot bisan na abtan kini sa huwaw. Photo by Alex Mapoy

BUTUAN CITY – Kampante ang PhilRice Agusan del Norte nga gamay lang ang kadaut nga nahimo sa weak El Niño sa probensya.

Basi sa obserbasyon sa buhatan, wala kaayo na apektohan ang mga mag-uuma sa nasinatiang huwaw labi na kadtong nanag-iya og basakan sanglit na atol kini sa harvest season.

Gihimo kini sa buhatan ang pagklaro human nagpagawas og initial estimate ang Department of Agriculture (DA) Caraga nga kapin sa P48 milyones ang damyos sa agrikultura sa probensya, apan ang maong kantidad ang ipailawom pa kini sa makuti nga pagsusi.

Sumala ni PhilRice Agusan del Norte Manager Abner T. Montecalvo, kon ugaling na apektohan ang ubang mag-uuma sa huwaw, apan sa bahin sa buhatan nga gidumala, makagarantiya kini nga wala na apektohan ang ilang pananom.

Pasabot ni Montecalvo, padulong na sa ting-ani dihang nasinatian pag-ayo ang huwaw sa probensya hinungdan nga kadtong nanag-iya og basakan nga kompleto og irigasyon, wala kini na alkansi sa tinanom niining humay.

Alang sa opisyal, nakatabang ang kainit sa panahon alang sa photosynthesis hinungdan nga green kaayo ang humay labi na kadtong dunay saktong irigasyon.

Pamugos usab sa opisyal, ang inisyal nga estimated damage nga unang gikataho sa DA Caraga ang posible nga makunhoran pa human kini mapailawom sa balidisyon.

Dumduman nga una nang gipagawas ning mantalaan nga pipila ka mga basak sa probensya ang nangaliki nunot sa huwaw.

Gani, usa ka mag-uuma ang nangabang pa og water pump aron matubigan ang basak nga gitikad sanglit wala kini na igo sa irigasyon.

Bisan nakalusot ang tinanom niining humay diin nakapamuswak kini og maayo ug niani og daghan, apan, didto giigo ang pipila ka mga mag-uuma sa galastohan sa fuel nga gitubil sa water pump ug usab sa abangan sa nasangpit nga pasilidad.