Pot Session Pangsud-an, Tagbalay Nisugot

Ni Alex Mapoy

Ramil Sekritaryo gibasahan sa search warrant nga gipagawas sa korte.

BUTUAN CITY – Usa ka padre de pamilya ang nisugot nga himuong pot session area sa druga ang kaugalingong panimay human gihanyagan nga hatagan og pangsud-an sa mga drug addict.

Naila ang maong amahan nga si Ramil Sekritaryo, 40 anyos, minyo, residente sa Purok 7, Barangay Port Poyohon ning siyudad.

Si Sekritaryo maoy usa sa mga dinakpan sa Philippine Drug Enforcement Agency (PDEA) Caraga atol sa gihimong ronda sa naasoy’ng lugar.

Giangkon ni Sekritaryo nga dunay iyang mga kaila nga mohangyo kaniya nga magsuyop og shabu sulod sa ilang panimay.

Dugang ni Sekritaryo, kada pot session sa iyang mga kaila, hatagan siya og kwarta pangpalit og sud-an hinungdan nga iya kining gidawat aron dunay ikapalit og sud-an ang iyang pamilya.

Hugot usab nga gihimakak sa nauwahi nga nagamitan siya og shabu sanglit kon dunay mo gamit sa ilang panimay, mo adto siya sa gawas aron magpalit og sud-an.

Dihang nakuha ang mga drug paraphernalia sulod sa panimay sa nahisgotan, patay limod usab ang nauwahi nga dili kadto iyaha kondi sa iyang mga kaila nga regular magamitan sa ilang panimay.

Sa asoy sa nauwahi, bugtong pangita sa ilang pamilya mao lamang ang pagpangantik o pagpang-scrap diin mo kita lamang sila og labing minus P70 ang adlaw ug ang pinakadako nga kitaon moabot lamang sa P200.