Pulis VAWC Violator

Ni Alex Mapoy

VAWC VIOLATOR. Pipila sa mga awtoridad ang nakalapas sa Republic Act 9262 o mas naila nga Violence against Women and Their Children Act of 2004 taliwala sila ang tigpatuman sa balaud.   

BUTUAN CITY – Gi-angkon sa kadumalahan sa Police Regional Office (PRO) Caraga nga pipila sa ilang mga sakop ang nakalapas sa Republic Act 9262 o mas naila nga Violence against Women and Their Children Act of 2004.

Sumala ni PSupt. Martin Mercado Gamba, ang kanhi Spokesperson sa PRO 13 nga pipila sa kaubanang pulis ang nakalapas sa maong balaud hinungdan nga bisan ila kining kauban sa han-ay, ila kining gidakop labi na niadtong nalutsan og warrant of arrest.

Dugang ni Gamba, ang maong buhat wala gi-tolerate sa rehiyonal nga buhatan sanglit nag-unang tahas nga gisangon kanila sa kagamhanan mao ang pagpatuman kon unsa ang nakalatid sa balaud.

Gitin-aw sa opisyal, dugay na nga pipila sa ilang kaubanan ang nakalapas sa maong balaud, apan wala lamang kini napasakahan og kaso sanglit usa kini ka pulis.

Asoy pa sa opisyal, dihang nasayran sa mga biktima nga puwede ang mga pulis pasakahan sa maong kaso, hinungdan nga pipila ka mga asawa sa ilang kaubanan ang nisang-at og kaso batok sa bana niining pulis.

Dali usab nga gipasabot sa opisyal, diyutay lamang ang maong ihap kon itandi sa kinatibuk-ang ihap sa kapulisan nga nadestino ning rehiyon,

“Dili lang na karon nahitabo nga dunay mga pulis nga nanapat sa ilang asawa, dugay nana siya. Karon lang na inform ang ilang asawa nga puwede diay nila ipa-priso ang ilang bana nga pulis,” pag-angkon ni Gamba.

Nanghinaut na lamang ang opisyal nga pinaagi sa pagpalapad sa impormasyon kabahin sa maong balaud, daghang bana nga mapasipad-on ngadto sa ilang asawa ang maleksyon ug mataral ngadto sa korte subay sa salaud nga ilang nahimo.