DENR Dismayado sa LGUs

Ni Alex Mapoy

DENR Caraga Communication and Development Office Supervisor Eric Gallego

BUTUAN CITY – Dismayado ang Department of Environment and Natural Resources (DENR) Caraga human nasuta nga wala kaayo gamita ang pundo nga gihatag ngadto sa local government units (LGUs).

Hisayran ang rehiyonal nga buhatan nipagawas og pundo balor P25.2 milyones gikan sa Bottoms-Up Budgeting (BUB) aron maseguro nga mapakusog ang National Greening Program (NGP) sa nasudnong kagamhanan.

Sumala ni DENR Caraga Communication and Development Office Supervisor Eric Gallego, dunay 15 ka mga barangay sa tibuok rehiyon ang target nga maoy mag-prudyos og mga semilya sa kahoy aron maoy magamit pagtanom sa Agusan del Norte, Agusan del Sur, Surigao del Sur, ug Dinagat Island.

Dugang ni Gallego, ulahing nahibaw-an sa rehiyonal nga buhatan nga wala kaayo gamita sa mga hingtungdang LGUs ang pundong gihatag alang sa nasangpit nga programa butang nga wala gikahimuot ni DENR Caraga Regional Director Nonito M. Tamayo.

Nasuta sa director nga 39 porsyento (39%) lamang sa kinatibuk-ang pundo nga gigahin ang nagamit katumbas sa P9.882, 268.

Gitin-aw sa opisyal, angay gamiton ang maong pundo sanglit dako kaayo matod pa kini og tabang nga makabaton og dugang kinitaan ang kabus nga mga pamilya pinaagi sa paglambigit sa seedling production.

Angay matod pa kini pahimuslan ang maong kahigayonan dungan sa panawagan nga angayang doblehon ang paningkamot sa 15 ka mga LGUs sa ingon dili masayang ang maong pundo.

Subay niini, daling gimandoan ni RD Tamayo ang tanan niining PENR Officers sa nahisgotang mga probensya aron tabangan kadtong mga LGUs pag-implementar sa nasangpit nga programa aron magamit ang pundong gigahin.