LGUs No Financial Support sa PDEA

Ni Alex Mapoy

PDEA Caraga Regional Director Julius R. Navales

BUTUAN CITY – Giklaro sa kadumalahan sa Philippine Drug Enforcement Agency (PDEA) Caraga nga ni bisan isa ka local government units (LGUs) wala naghatag kanila og pinansyal nga ayuda alang sa pagpakusog sa operisyon sa ahensya batok drugas.

Gikabutyag ni PDEA Caraga Regional Director Julius R. Navales, nag-operate ang ilang buhatan gamit ang kaugalingong panudlanan sa ahensya.

Dugang ni Navales, kon ugaling maghatag ang LGUs og ayudang pinansyal kanila, ila kining pasalamatan.

“Wala pa kaming financial supports na natanggap sa mga LGUs... We operate within our own resources. Kung magbigay sila, malaki naming pasalamat,” pagklaro ni Navales.

Hisayran nga sa tibuok rehiyon sa Caraga, ang negosyo sa shabu ug marijuana ang nikusog basi sa PDEA Accomplishment Reports sa unang tulo lamang ka kwarter ning tuiga.

Basi sa datos, mokabat sa 1.5 kilo nga shabu ang nakompiska sa kinatibuk-ang operisyon sa maong buhatan kansang bulto sa druga nikantidad og P12,753,688.25.

Sa maong gidaghanon sa nakompiska nga shabu, halos isa ka kilo ang nakuha dinhe lamang sa dakbayan sa Butuan kansang epektos nakuha gikan sa posisyon sa 19 ka mga indibidwal.

Nagsunod ang Surigao del Norte nga dunay 233.41 gramos nga shabu; ikatulo ang Agusan del Sur nga dunay 200 gramos nga shabu; ikaupat, ang Surigao del Sur nga dunay 130.33 gramos nga shabu; ug ikalima, ang Agusan del Norte nga dunay 0.50 gramos nga shabu nga nakompiska.

Ang maong bulto sa shabu nga nakompiska, gikan lamang sa kinatibuk-ang operisyon sa ahensya sa unang tulo ka kwarter ug wala pay labot ang mga shabu nga nakompiska sa habig sa Philippine National Police (PNP).

Una nang gipahayag sa opisyal nga paspas ang pagkuyanap sa drugas diin tanang barangay nga sakop sa siyudad sa Butuan, sumala sa opisyal, ang apektado na sa makabuang nga shabu.