Bakwit Nagpakilimos ug Nanglungkab Na

Ni Alex Mapoy

SURIGAO DEL SUR – Nagpakilimos ug nanglungkab na ang pipila ka mga bakwit nga lumad sa Tandag Sports Complex tungod sa kalisod nga ilang nasinati bunga sa epekto sa binuhatan sa Bagani Forces.

Sumala ni Surigao del Sur Governor Johnny Pimentel dihang nahinabi sa media nga giguba sa mga bakwit ang kural ug gilungkab pa ang bodega nga puno sa plywood.

Dugang ni Pimentel, naningkamot ang probensyal nga kagamhanan nga ang mga nahisgotan matabangan hinungdan nga nihangyo kini ngadto sa mga nahisgotan nga dili pun-an ang problema.

“Sa mga kural, giguba na. tapos, nay among bodega, napuno og plywood. Ilang gilungkab. Bisan nagtabang ta sa ila, naghatag usab sila og problema,”pahayag ni Pimentel.

Una nang namatikdan sa mga pasahero sa Bus Terminal nga pipila ka mga lumad ang nagpakilimos aron duna kini ikapalit sa inadlaw niining panginahanglan.

Gitin-aw sa gobernador, pag-abot sa Nobembre, ang probensya na ang naghatag pagkaon sa mga bakwit human niundang pagtunol og hinabang ang ubang ahensya sa kagamhanan ug mga pribadong sektor.

Sa inisyal nga estimate sa opisyal, mogasto ang probensya og P650,000 kada semana alang sa pagkaon sa mga bakwit hinungdan nga gihangyo sa nauwahi kadtong pipila ka mga bakwit nga duol lamang ang pinuy-anan nga mamauli na aron dili mag-antos sa gibakwitang dapit.

Sukad nahitabo ang September 1 Lumad Killing, nikabat na sa kapin duha ka bulan ang pagpuyo sa mga bakwit sa evacuation center.