Prisohan Gihimong Bakasyonanan

Ni Alex Mapoy

BUTUAN CITY – Gihimong balay bakasyonanan ang Butuan City Jail (BCJ) sa mga indibidwal nga nalambigit sa gidiling drugas.

Kon basehan ang kasamtangang populasyon sa maong pasilidad, nilansang na sa 820 ka buok piniriso nga nagpuyo sa maong prisohan diin 735 niini mga lalaki samtang 85 mga babae.

Gikabutyag ni Jail Officer 1 Psychie B. Macagaan, ang Inmates Welfare and Development Officer and Community Relations Service Officer sa BCJ, kadaghanan sa mga napriso sa maong pasilidad mao kadtong nalambigit sa gidiling drugas.

Dugang ni Macagaan, pipila sa mga piniriso ang sulod – gawas na sa maong prisohan sanglit kon kini makagawas, mobalik usab kini og pamaligya’g shabu o kaha marijuana hinungdan nga kon madakpan, mo balik ra usab kini pagpuyo sa pasilidad.

Walay problema ang mga piniriso sa maong pasilidad sanglit libre kini sa katulgan, libre sa pagkaon, ug libre pa og gwardiya kinsa magbantay kanila baynte kwatro oras.

Pinasikad sa kwentada sa opisyal kabahin sa pagkaon, ang matag piniriso dunay budget nga P50 nga nagtimaan ang goberno mo gasto og P41,000  kada adlaw sa 820 ka buok piniriso sa BCJ; P1,230,000 kada bulan, ug P14,760,000 kada tuig.

Ang pundo gikuha gikan sa panudlanan sa nasudnong panggamhanan kansang gidak-on sa pundo ang dako na kaayo og ikatabang pagpabarug og imprastraktura nga mapahimuslan sa tanan.