VAWC Cases Nabasura

Ni Alex Mapoy

NABASURA. Kadaghan sa mga kaso nga gisang-at sa piskalya, apan kadaghanan usab sa reklamante ang niatras sa kaso labi na kon ang biktima mao ang asawa.  

BUTUAN CITY – Taliwala nga daghan ang nisang-at og kaso sa kalapasan sa Violence Against Women and their Children (VAWC), apan sa lebel pa lamang sa piskalya, daghan ang nabasura.

Gikabutyag ni Cristina Mae G. Quinacan – Cañedo sa Department of Justice (DOJ) Caraga, daghan ang nabasura nga kaso sa lebel pa lamang sa piskalya sanglit kasagaran sa mga nisang-at og kaso labi na kon asawa ang biktima, mo atras pipila ka adlaw gikan sa pagsang-at.

Dugang ni Cañedo, maayo lang matod pa sa pagsang-at og kaso ang mga biktimang asawa batok sa ilang bana, apan kon maglisod na kini sa pagtubag sa inadlaw’ng panginahanglan, pasayloon na lamang ang bana aron dunay mo buhi kanila.

Saysay usab sa opisyal, dunay iyang kliyente diin halos kada bulan kini magpasaka og kaso batok sa bana human kini kulataha hinungdan nga iyang makasab-an.

Apan, maglisod usab siya pagpugos sa reklamanteng asawa nga ipadayon ang kaso sanglit himuong rason sa biktima kon kinsa ang mo pakaon kanila kada adlaw kon mapriso ang iyang bana.

Subay niini, nipasalig ang mga membro sa Regional Development Council - Gender & Development Coordinating Committee (RDC-GADCC) Caraga nga lingkoran ug tun-an ang maong problema aron dili mahimong makaluluoy ang mga reklamante labi na kon ang biktima mao ang asawa nga nahimong puntirya sa pagpangdagmal ug pagpangabuso sa lampingasan nga bana.