Gatosan Ka Semilya Natisok sa 4Ps

Ni Alex Mapoy

BUTUAN CITY – Gikalipay sa liboang benepisyaryo sa Pantawid Pamilyang Pilipino Program (4Ps) sa Department of Social Welfare and Development (DSWD) Caraga ang pagsalmot sa Pantawid Pamilya Green Day nga gihimo diha sa Diversion road, Brgy. Kinamlutan sakop ning siyudad sa Butuan adtong Bernes sayo sa buntag.

Sa kapin usa ka libo ka mga benepisyaryo nga ni-apil sa maong kalihokan, kapin 500 ka mga klaseng semilya sa kahoy ang malampuson nga natisok daplin sa kalsada.

Gikabutyag nila 4Ps beneficiaries Maricel Serenado ug Erlinda Mama, pulos residente sa Brgy. Kinamlutan sakop ning siyudad nagbutyag nga gikalipay nila pag-ayo nga naka-apil sila sa maong aktibidad nga gipasiugdahan sa DSWD Caraga ilawom sa kadumalahan ni DSWD Caraga Regional Director Minda B. Brigoli, CESO III. 

Gipasalig nila Maricel ug Erlinda, nga ang tinanom nilang semilya sa kahoy ang mabuhi sanglit kada adlaw nila kining pagaduawon aron ilang paga-atimanon.

Sa bahin usab ni DSWD Caraga 4Ps Regional Information Officer II Ryan Malbas Tapayan, nipasabot kini nga ang gihimo sa mga benepisyaryo sa 4Ps ang nagpadayag sa “social responsibility” sa mga nahisgutan.

Dugang ni Tapayan, dili lamang kutob sa pagtambong sa ipatawag nga mga tigom ingon man pagdawat sa mga benepisyo ang obligasyon sa mga nahisgutan kondi kabahin sa kaakohan sa mga nahisgutan mao ang paghimo sa responsibilidad diha sa katilingban sama sa pagtanom og semilya sa kahoy.

Gitin-aw pa sa opisyal, kapin usa ka libo ang nisalmot sa maong aktibidad, apan kapin 500 lamang ka mga semilya ang natisok sanglit matag semilya, duha ang nagtinabangay pagtanom.

Gituyo matud pa kini nga sistema aron maseguro nga maatiman pag-ayo ang tinanom nga semilya aron kini mabuhi.

Niangkon usab ang nauwahi nga ang gihimong pagpananom og kahoy maoy pinakaunang gihimo sa ahensya ingon man sa tanan niining benepisyaryo sa programa.

Gikalipay usab sa nahisgutan nga sento porsyento ang gipakitang suporta sa mga benepisyaryo sa tanang kalihokan.

Una niini, adiser nagpahigayon sa pagpananom og kahoy ang mga nahisgutan, nagtapok una kini sa Brgy. Bonbon Covered Court isip assembly area ug sa maong dapit, pormal nga gisugdan ang kalihokan sa usa ka Zumba Dance.

Human sa pagsayaw, namaktas pa ang mga nahisgutan sa kapin usa ka kilometro aron pag-adto sa dapit dis-a itanom ang nagkadaiyang klase sa semilya sa kahoy.

Tanang nisalmot sa maong kalihokan ang na gikan lamang sa dakbayan sa Butuan diin ang uban kanila ang nag-hire pa og sakyanan aron lamang makaabot sa nasangpit nga dapit.