Dagkong Proyekto Dungan Ilusad

Ni Alex Mapoy

PROJECTS: Nalantawan ni PCA Caraga Acting Project Development Officer Grace Orilla nga dako og ikatabang sa panginabuhi sa tanang coco farmers ang duha ka mga dagkong proyekto nga dungang ilusad sa hinapos nga bahin ning bulana. 

BUTUAN CITY – Dungan nga ilusad sa Philippine Coconut Authority (PCA) Caraga ang Double Up Cacao Project ug Coco Coir Fiber Processing Plant sa hinapos nga bahin ning bulana.

Ang maong paglusad, gilauman nga tambongan kini ni Presidential Assistant for Food Security and Agricultural Modernization Sec. Francis “Kiko” Pangilinan.

Kahinumdoman, gitakda sa sayong bahin ning bulana ang paglusad sa Double Up Cacao Project, apan gipa-opktaba kini sa rehiyonal nga kadumalahan sanglit gusto niining idungan na lamang kini paglusad sa Coco Coir Fiber Processing Plant nga nahimutang sa Brgy. Mabuhay siyudad sa Bayugan.

Sumala ni PCA Caraga Acting Project Development Officer Grace Orilla, ang building na lamang sa planta maoy gihulat kon anus-a kini mahuman ug gilauman sa rehiyonal nga buhatan nga mahuman kini adiser mapupos ang kasamtangang bulan.

Ang Double Up Cacao Project namugna tungod sa pagtinabangay sa Mindanao Development Authority (MINDA), Local Government Unit (LGU), ug ahensya pinaagi sa Memorandum of Agreement (MOA).

Kini nga proyekto ang lahi sa regular nga proyekto nga Coconut-Cacao Intercropping sa ahensya.

Samtang ang Coco Coir Fiber Processing Plant, usa ka pasilidad nga gipundohan sa Japan-Asean Integration Fund (JAIF) balor P15 milyones.

Usa kini ka pasilidad nga mo galing sa mga bunot sa lubi diin ang finished product niini mao ang geonet ug twinning (pisi) kansang mga produkto magamit sa mga proyektong ilusad sa Department of Public Works and Highways (DPWH) ug sa industriya sa mina.

Ang nahisgotang mga proyekto ang dako kaayo og ikatabang nga mapalambo ang lebel sa kahimtang sa pamuyo sa mga mag-uuma sa lubi.