Sawmill sa Surigao Napaundang

Ni Alex Mapoy

DENR Caraga Regional Director Nonito M. Tamayo.
Photo by Alex Mapoy

SAN MIGUEL, Surigao del Sur – Na alarma ang mga illegal loggers sa Caraga dihang pursigido ang kasamtangang liderato sa Department of Environment and Natural Resources (DENR) Caraga nga ipahunong ang construction sa sawmill plant nga nahimutang sa hilit nga bahin sa Brgy. Magroyong, San Miguel, Surigao del Sur.

Giila sa ahensya ang maong planta nga Montevesta Woodcore Industries nga gipanag-iyahan ni Luchayhua Libuangan Limlao, kasamtangang nanimuyo sa lungsod sa Montevesta sakop sa probensya sa Compostela Valley.

Sumala ni DENR Caraga Regional Director Nonito M. Tamayo, gimanduan ang kadumalahan sa Montevesta Woodcore Industries nga ihunong ang pag-construct sa sawmill plant human pakyas kini nga mapakita ang gikinahanglang dokumento aron isipong legal ang operisyon.

Wala napakita sa kadumalahan sa maong kompanya ang mga pertinenteng dokumento sama sa building permit, environmental clearance, certificate ingon man permit gikan kang DENR Secretary Ramon Paje ngadto sa DENR team nga nagpahigayon og inspeksyon.

Dugang ni Tamayo, bugtong napakita lamang sa foreman nga maoy niatubang kanila ang Certificate of Business Registration nga gi-isyu sa Department of Trade and Industry (DTI) nga mo expire karong 2019 ug ang aprubadong resolusyon gikan sa Sanggunian Bayan sa lungsod sa San Miguel (September 17, 2013) kansa nagduso ngadto sagobernador sa nahisgutang probensya nga tugtan ang maong planta nga itukod sa nahisgutang lungsod.

Giklaro pa sa direktor, ang nahuptang WPP permit sa Montevesta ang ni-expire na ug nuntan pa sa pagdeklara sa naasoy’ng kompanya nga ang operisyon sa kompanya ang giundang na taliwala nga ang “log supply” niini gikan sa Malaysia ang pabilin pang nagtunhay.

Nasuta nga ang log supply sa kompanya gikan sa duha ka local suppliers sa Surigao del Sur dunay “existing record” nga 15.30 cubic meters samtang ang nahisgutang kompanya ang duna pay kontrata sa pribadong “tree plantation” sa naasoy’ng probensya nga kayang mo suplay og 3,191.38 cubic meters.

Ulahi usab nga nasayran sa team nga gipangulohan ni PENRO Surigao del Sur Technical Services Division Chief Federico A. Senoc, Jr. nga tapad sa maong planta ang “timberland” diin dunay daghang nagtubo nga “natural-grown species.”

Daghan ang naglantaw nga kon matukod ang maong “sawmill plant” segurado nga mawagtang ang nahisgutang natural-grown species” sanglit sikbit lamang kini.

Atol sa operisyon, nakompiska ang 132 ka buok nga bag-ong ginabas nga lawaan katumbas sa 1,758 ka board feet gikan sa construction site.