Pulis Mag-logging Leksyonon!

Ni Alex Mapoy

PRO 13 Spokesperson PSupt. Martin Gamba.
Photo by Alex Mapoy

BUTUAN CITY – Leksyonon sa liderato sa Police Regional Office (PRO) 13 ang pulis nga makompermang nilambigit sa illegal logging acitvities ning rehiyon sa Caraga.

Sumala ni PRO 13 Spokesperson PSupt. Martin Gamba, pursigido ang liderato ni PRO 13 Regional Director PCSupt. David Ombao nga leksyonon kadtong pulis nga mapamatud-an nga nagpahigayon og illegal logging sa bisan asang dapit ning rehiyon.

Klaro ang mandato ni PCSupt. Ombao, dugang ni Gamba, ngadto sa kapulisan nga likayan ang paglambigit sa maong matang sa kalihokan.

Gitin-aw sa opisyal, wala gi-tolerate sa liderato ni PCSupt. Ombao ang samang kalihokan sanglit hugot kining nisuporta sa panawagan ni Department of Environment and Natural Resources (DENR) Secretary Ramon Paje nga Zero Incidence sa Illegal Logging sa tibuok nasod ug usab sa Executive Order 23 ni Pangulong Noynoy Aquino nga indefinite log ban nga ipatuman sa tibuok kapupud-an.

Sa pagkutlo ning balita, gipaneguro ni Gamba nga walay nadawat nga impormasyon ang rehiyonal nga buhatan nga dunay sakop sa kapulisan ang nilambigit sa iligal nga pagpamutol sa kahoy sa bisan asang dapit ning rehiyon.

Pamugos sa nauwahi, kon makadawat kini og impormasyon nga dunay pulis nga nag-apil apil sa maong kalihokan, aksyonan gilayon nila kini pinaagi sa pagpahigayon og imbestigasyon aron masuta kon tinuod ba ang maong taho.

Kon ugaling makomperma nga tinuod ang nadawat nga impormasyon, dili magpanuko ang kadumalahan ni Ombao nga mo pahamtang og silut sibo sa kalapasan nga nahimo.

Pasabot sa opisyal, trabaho sa kapulisan ang pagsumpo sa iligal nga kalihokan sama sa illegal logging ug dakpon ang nalambigit aron itaral sa hukmanan.

Pahimangno sa opisyal sa tanang membro sa kapulisan, himuon ang tahas nga gisangon kanila ug likayan ang paglambigit sa iligal nga kalihokan.

Hangyo usab sa opisyal sa publiko, kon dunay mamatikdan nga dunay silingang pulis nga nilambigit sa illegal logging, isumbong gilayon kini sa ilang buhatan aron kahatagan sa tino nga aksyon aron mapakgang ang iligal niining buhat.