Upos Hinungdan sa Sunog

Ni Alex Mapoy 

SUNOG: Nisagol na lamang ang mga biktimang residente sa mga ususerong indibidwal pagsaksi sa ilang panimay nga gilamoy sa kalayo. Photo by Alex Mapoy

BUTUAN CITY – Nilabay nga upos sa sigarilyo ang gitumbok nga hinungdan sa pag-ulbo sa kalayo sa Purok 8 Slaughter, Brgy. Obrero ning siyudad, adtong Lunes pasado alas-5:30 sa hapon.

Halos 30 ka mga panimay ang nalamoy sa kalayo ug dul-an P200,000 ang nabiling damyos sa hitabo.

Paspas nga gilamoy sa kalayo ang nahisgotang kabalayan nga gama sa kahoy sanglit sigkit lamang kini.

Sa imbestigasyon sa Bureau of Fire Protection (BFP) Butuan, gipahayag ni Acting City Fire Marshal Cesar Kinazo, nagsugod ang maong sunog sa panimay ni Inday Piencenaves kansang residensya gihimo nga boarding house.

Kasagaran nga nag-abang sa maong panimay ang pulos dunay pamilya.

SUNOG: Yanong gilamoy sa kalayo ang kabalayan nga gama lamang sa kahoy.

Adiser ang hitabo, isa sa mga residente nga nagpuyo sa Imburnal area sakop sa maong purok ang nagbutyag nga tulo ka higayon na nga diriyut masunog ang maong panimay, apan swerte na lang nga dali kining natabang.

Isa sa mga residente sa nasunogan nga bahin kinsa nagpaila lamang sa pangalang Inday ang niaging semana lamang nibalhin pagpuyo sa Imburnal nga bahin sulod sa luna nga gipuy-an sa pursusong igsuon.

Si Inday nagkanayon nga dugay na sila nga gipapahawa sa tag-iya sa maong luna, apan wala lamang nagpakabana ang mga nasunogan sanglit wala kini luna nga kabalhinan ug kon duna man, layo usab ang luna nga gihatag sa lokal nga kagamhanan ug diha usab sila nanginabuhi.

Alang kang Inday, swerte na lamang nga nakabalhin sila pagpuyo sa niaging semana sanglit kon wala pa, apil usab ang ilang panimay nga malamoy sa kalayo.

Subay sa hitabo, daling gisagop sa lokal nga kagamhanan sa maong barangay ang mga nasunogan diin kasamtangan kining gipahikling sa Barangay Covered Court samtang ang uban ang nipasilong una sa ilang kabanay.

Daling nitunol usab ang kagamhanang lokal ning dakbayan sa panginahanglan sa mga nasunogan kansang tabang gipaagi sa City Social Welfare and Development (CSWD).

Sa pagsulat ning balita, padayon ang gihimo nga makuting pagpanubay sa ginsakpan sa BFP Butuan aron mahatagan og katin-awan ang maong insidente.