Immunization Pormal Nang Sugdan

Ni Alex Mapoy 

DOH Caraga Regional Director Jose Llacuna, Jr.

BUTUAN CITY – Hingpit nang gisugdan sa Department of Health (DOH) Caraga ang pagpamakuna ngadto sa piniling kabataang magtutungha ning rehiyon.

Nasayran nga wala nasugdan sa nakalabay’ng semana ang maong kalihokan sanglit nihangyo mismo si Department of Education (DepEd) Caraga OIC – Regional Director Dr. Rebecca Delapuz ngadto kang DOH Caraga Regional Director Dr. Jose Llacuna, Jr. nga karong semanaha na lamang sugdan ang maong aktibidad sanglit nipailawom sa first grading exam ang target nga pagabakunahan.

Inisyatiba usab kadto ni Dr. Delapuz sanglit nanagana lamang ang opisyal sa posibleng reaksyon sa tambal nga ibakuna ngadto sa kabataan.

Sugod ning adlawa hangtod sa kataposang bahin ning bulana, mokabat sa 71,620 Grade 1 pupils ug 51,413 Grade VII students ang pagabakunahan sa tibuok rehiyon.

Sumala ni DOH Caraga Expanded Program on Immunization Coordinator Nurse V Ma. Jasmin Sarce, tuyo sa kalihokan nga mabatokan ang measles transmission.

Dugang ni Sarce, bakunahan ang nahisgotang mga magtutungha sa Measles-Mumps-Rubella (MMR) ug Tetanus Diphtheria (Td).

Daan nang gitin-aw ni Sarce, ang libreng bakuna ihatag lamang ngadto sa mga estudyante nga dunay pagtugot sa ginikanan samtang kadtong mga magtutungha nga wala tugti sa ginikanan nga magpabakuna ang dili pugson o kaha suspendihon sa klase.

Pamugos ni DOH Caraga Regional Director Jose Llacuna, Jr. importante kaayo nga mahatagan ang mga estudyante sa “lifetime immunity” batok sa tetanus, mumps, rubella, ug diphtheria.

Paneguro ni Dr. Llacuna, ang mga bakuna nga iturok ngadto sa mga estudyante ang luwas nga gamiton, epektibo, ug gigamit kini sa tibuok kalibotan.

Pahimangno usab sa direktor, kadtong estudyante nga dunay pagtugot sa ginikanan nga bakunahan ang kinahanglan nga dunay kaon adiser turokan.

Pipila sa mga reaksyon nga mahimong masinatian sa estudyante nga mabakunahan mao ang pagka-kuyapan, mo hubag ang gibakunahan nga parte sa lawas, hilantan, ug magka-skin rashes.

Mando usab sa opisyal, niadtong team nga magpahigayon sa pagpamakuna, gi-obliga nga dunay naka-standby nga ambulansiya aron madala gilayon sa ospital kadtong estudyante nga kinahanglang dalhon kon kini makasinati og reaksyon sa tambal nga giturok.

Ang 2015 School-Based Adolescent Immunization dili lamang ipahigayon dinhe sa rehiyon sa Caraga kondi tibuok nasod kini nga kalihokan nga himuon sulod ning bulana nga gisabak sa tema, “Bakuna para sa kabataan, Proteksyon sa kinabukasan.”