Bayanihan sa Parole, Wala Nahinayon

Ni Alex Mapoy

BUTUAN CITY – Wala nahinayon ang mga kliyente sa Parole and Probation Administration (PPA) Butuan nga mabalayan ang isa sa ilang kaubanan nga biktima sa sunog sa Purok 8 Slaughter, Brgy. Obrero ning siyudad sa nakalabay’ng adlaw.

Hisayran nga nagkauyon ang mga nahisgotan nga mag-Bayanihan aron makabarug sa kaugalingong pinuy-anan si Rudy Palma kinsa yanong nanimuyo sa maong dapit ug nanginabuhi sa merkado pinaagi sa pagpaninda og mga gulay ingon man mga lamas.

Target sa grupo nga mapabarug ang maong panimay adtong Merkules nga adlaw, apan pakyas kini human gi-koral og barb wire ang nasunogan ug wala na pasudli sa tag-iya ang maong luna.

Una niini, gikalipay ni Chief Probation and Parole Officer Cristina R. Argente human nihimo og inisyatiba ang ilang mga kliyente nga mag-amot amot aron matabangan ang kaubanang kliyente nga nasunogan.

Nakatigom ang grupo og P888 kansang salapi gipalit og dugang materyales alang sa pagpabarug sa balay ni Palma.

Wala matod pa nagdahom si Argente nga mao kini himuon sa ilang mga kliyente – ang pagtabang sa kaubanang kliyente nga nasunogan.

Dali usab nga nagdesisyon ang opisyal pinaagi sa paghatag sa donated confiscated logs gikan sa Department of Environment and Natural Resources (DENR) Caraga nga alang unta sa pagpatukod og waiting-shed sa Trevolution Site, Brgy. Bancasi ning siyudad aron makabalay ang ilang kliyente.

Si Parole and Probation Office II Alex Castaños nipasabot nga mas gipili ni Argente nga ihatag ang maong donated nga kahoy sa ilang kliyente sanglit nakita niini ang hinanaling panginahanglan diin ang balay isa sa mga basic needs sa matag usa.

Sa pagsulat ning balita, padayon pang nangita og paagi ang buhatan kon unsay mahimo aron matabangan ang ilang kliyente labi pa nga wala na tugti sa tag-iya sa maong luna nga makabalik pagpatukod og balay ang mga nasunogan.