Family Planning Gisaulog

Ni Alex Mapoy

DOH Caraga Regional Director Dr. Jose R. Llacuna, Jr.

BUTUAN CITY – Tinguha sa Department of Health (DOH) nga matabangan ang magtiayon pagplano sa pamilya hinungdan gisaulog ang National Family Planning Month ning bulana.

Katuyoan niini nga mapakusog ang kampanya ug mapalapdan ang information drive labi na niadtong magtiayon nga makonsiderang anaa pa sa reproductive age.

Pinaagi niini, maumol ang magtiayon padulong sa pagka-responsableng ginikanan ug maplastar ang kahimtang sa pamuyo labi na sa pagmintina sa kahimsog sa panglawas.

Sumala ni DOH Caraga Regional Director Dr. Jose R. Llacuna, Jr. sulod sa isa ka bulan nga selebrasyon, i-bida ang nagkadaiyang Family Planning methods nga mahimong kapilian sa magtiayon pinaagi sa paglusad sa nagkadaiyang kalihokan sama sa counseling, paghatag sa saktong impormasyon, ug korehian ang mga sayop nga pagtuo.

Dugang ni Dr. Llacuna, sa maong paagi, maminusan ang peligro nga hatod sa pagpanganak.

Gipasabot sa direktor, kon duol lamang ang lak-ang sa pagpanganak diin ang pagpanganak daw kanta nga ‘do, re, me…” taas kaayo ang porsyento nga mamiligro ang inahan ingon man bata nga ihimugso.

Labot niana, mapaubsan usab ang insidente sa sayong pagsabak sa kabataan.

Dinhe sa rehiyon, ilusad ang nagkadaiyang kalihokan sa mga siyudad sama sa Butuan, Cabadbaran, Bayugan, Surigao, Bislig, Tandag ug mga lungsod sa San Francisco Agusan del Sur ug San Jose sa Province of Dinagat Island (PDI).

Ang tibuok bulan nga selebrasyon gisabak sa tema Kapag plano, Panalo!