Hi-5 sa Ospital Gilusad

Ni Alex Mapoy

DOH Caraga Regional Director Dr. Jose R. Llacuna, Jr.

BUTUAN CITY – Hingpit nang gilusad sa Department of Health (DOH) Caraga ang Hospital High Five strategies ning rehiyon.

Pokus sa kalihokan nga mahatagan sa tino nga pagtagad ang Maternal, Infant and Child Health, HIV/AIDS, ug Service Delivery Network.

Gikabutyag ni DOH Caraga Regional Director Dr. Jose R. Llacuna, Jr.isa sa mga pamaagi nga mapalambo ang “patient-centered care” mao ang Alagang Pinoy Kiosk.”

Sulod sa maong pasilidad ang mga impormasyon kabahin sa serbisyong gihanyag sa ospital ingon man ang mga staff, patient navigation, PhilHealth Enrolment, ug kasayuran kabahin sa Hi-5 nga mga adbokasiya.

Alayon niini, mahatag ang sento porsyento nga Customer Service Satisfaction pinaagi sa “trained hospital staff” kon unsaon paghatag sa maayong serbisy ngadto sa mga kliyente.

Giseguro usab ang pagpakusog sa service delivery network pinaagi sa mapadayunon nga profiling sa mga pasyente aron mahatag ang hustong referral system.

Seryoso usab nga gimando sa direktor sa tambalanang pampubliko ang No Balance Billing Policy pinaagi sa pag-andam sa gikinahanglang medisina ug paghatag sa hustong mekanismo sa pagpalit sa mga tambal.

Atol sa paglusad, gihimo usab ang Alagang Kiosk Launching, Branding with Mascot Launching, HIV Testing, Counselling, ug Bloodletting activity.

“We will never stop from providing the best services for our citizens. No matter how long it will take us to achieve our goals, what’s important is that we never stop learning and improving,” pagtin-aw ni Dr. Llacuna.