Kalidad sa Yuta Nagkaubos

Ni Alex Mapoy

Hulagway sa yuta subay sa gihimong pagtuon sa Bureau of Soils Water and Management. Photo by Alex Mapoy

BUTUAN CITY – Padayon nga nagkaubos ang kalidad sa yuta sa kalibotan hinungdan nga angayan nang mo lihok ang katawhan aron mapugngan ang hingpit nga pagkadaut niini.

Basi sa datos nga gihikyad ni Regional Coordinator Bureau of Soils Water and Management Marcelo P. Dayo, 33% sa yuta sa kalibotan ang hingpit nang na umaw tungod sa serye nga pagdahili, salinization, compaction, acidification, chemical pollution, ug nutrient depletion.

Gipahayag ni Dayo, apektado ang functions sa yuta ingon man ang produksyon sa pagkaon tungod sa maong kahimtang.

Sa pagtuon nga gihimo sa Bureau of Soils Water and Management, 83% sa mga katawhan sa Sub-Saharan Africa ang nagsalig sa yuta aron sila mabuhi, apan sa kasamtangang panahon, 40% sa kayutaan sa Aprika ang nadaut o na umaw.

Nalantawan sa Bureau nga sa tuig 2050, kon moabot ang kinatibuk-ang ihap sa populasyon sa 9 bilyones, nagtimaan kini nga manginahanglan ang katawhan og dugang “healthier and nutritious food.”

Pasabot sa opisyal, makab-ot lamang ang maong panginahanglan sa katawhan kon mo taas ang produksyon sa agrikultura sa “60% globally” samtang 100% sa gikonsiderang “developing countries.”

Kini nga hagit ang angayan matod pang magtinabangay ang katawhan aron pag-abot sa maong panahon, pabiling tabunok ang kayutaan aron mabuhi ang pananom nga maoy pagkaon sa katawhan.

Alang sa opisyal, angayan nga ampingan ang yuta sanglit alang kaniya, “soil is a non-renewable resource.”