Blood Shortage Padayong Nasinati

Ni Alex Mapoy

PRC Agusan del Norte – Butuan City Chapter Blood Center In-Charge Dan Mark Moral

BUTUAN CITY – Taliwala sa subsob nga bloodletting activity nga gihimo sa Philippine Red Cross (PRC) Agusan del Norte – Butuan City Chapter, pabilin pa gihapon nga kulang ang suplay sa dugo sa nahisgotang buhatan.

Hisayran nga matag bulan, gikinahanglan nga makatigom og 800 ka bag sa dugo ang lokal nga buhatan aron masuplayan ang panginahanglan sa katawhang Agusanon.

Basi sa kasinatian, mo duwa lamang sa 400 hangtod 600 ka bag sa dugo ang makolekta sa buhatan matag bulan hinungdan nga kanunay magkulang ang suplay sa dugo.

Sumala ni PRC Agusan del Norte – Butuan City Chapter Blood Center In-Charge Dan Mark Moral, wala sila nagkulang pag-awhag sa katawhan nga mag-donar og dugo aron daghang kinabuhi ang maluwas.

Dugang ni Moral, usa sa nakita niining hinungdan nganong kanunay magkulang ang suplay sa dugo ug gamay lamang ang mag-donar sa kaugalingong dugo mao ang kahadlok nga makuhaan og dugo.

Gawas niana, usa usab sa nakapasamot nganong gamay lamang ang mag-donar og dugo mao ang blood processing fee nga P1,800.

Gipasabot sa opisyal, mapugos sila pagkolekta sa processing fee sanglit wala silay pundo alang sa screening test sa dugo.

Nimahal matod pa ang gikinahanglang gamit alang sa pagproseso sa dugo hinungdan nga nausbawan og P300 ang kanhi nga P1,500 nga processing fee.

Importante usab matod pa nga ipailawom sa screening test ang dugo nga nakolekta aron dili ma-abuno kadtong dugo nga kontaminado sa makatakod nga sakit.

Subay niini, padayon nga nag-awhag ang opisyal sa katawhan nga mo donar kini sa kaugalingong dugo aron ang tanang manginahanglan, mahatagan.