15 Reklamo Gipailawom sa SENA

Ni Alex Mapoy

NLRC Caraga Administrative Officer V Robert M. Aying

BUTUAN CITY – Kinse ka mga reklamo ang gipaabot sa mga reklamante sa buhatan sa National Labor Relations Commission (NLRC) Caraga sa nakalabay’ng bulan sa Hulyo.

Sa kinatibuk-ang ihap, 11 niini ang na areglo, 2 ang naduso ngadto sa arbitration, samtang ang laing 2 ka reklamo ang padayon pang gidungog.

Gikabutyag ni NLRC Caraga Administrative Officer V Robert M. Aying, human nakaabot ang maong reklamo sa ilang buhatan, gipailawom kini sa Single Entry Approach (SENA).

Pasabot ni Aying, kon ang duha ka habig dili madala og areglo, wala silay mahimo kondi iduso kini ngadto sa compulsory arbitration.

“For SENA, we have 15 (RFA) Request For Assistance for the Month of July. Out of these 15, 11 of these are settled. Na areglo ning onse kay within 30-day period mao man gyud ni rule sa SENA, within 30 days, puwede na siya areglohon kay kon dili, i-indorse nimo sa sakto nga mga opisina. So, out of these 15, 11 are settled, duha ani wala pa sila na areglo so, i-refer nato sa compulsory arbitration, and ang duha ini pending for hearing,” pahayag ni Aying.

Una nang gipahayag ni NLRC Caraga Executive Labor Arbiter Atty. Exequiel M. Dayot nga paningkamotan sa buhatan nga ma-areglo ang tanang reklamo aron dili na mo dako pa ang maong bangi.

Dili usab buot ang buhatan nga magastohan pa pag-ayo ang duha ka habig labi na ang mga reklamante nga nagsalig lamang sa madawat nga sweldo.

Alang sa opisyal, kon mo dako pa ang reklamo, ang labing makaluluoy ang reklamante sanglit bisan mo daug pa kini sa kaso, mag-antos kini sa galastohan diin makuhaan pa ang inadlaw niining budget nga alang unta sa pagkaon.