Water Facilities Gi-Shutdown

Ni Alex Mapoy

High Water Turbidity. Courtesy of BCWD

BUTUAN CITY – Temporaryong gi-shutdown sa Butuan City Water District (BCWD) ang pasilidad nga nahimutang sa Sitio Iyao, Barangay Anticala ning siyudad, adtong Martes sa hapon.

Gihimo kini human kalit nga nibundak ang makusog nga ulan sa watershed area nga nagresulta sa grabe ka lubog sa tinubdan sa tubig.

Dumduman nga gibundakan sa makusog nga ulan ang sentrong bahin ning siyudad pagka-udto, apan subleng gi-ulan ang siyudad sa watershed na nga bahin.

Hisayran nga pasado ala-1:00 hangtod alas-4:00 sa hapon sa samang adlaw, gi-shutdown nang daan ang pasilidad sa water source human nagpahigayon og maintenance operation ang water district sa maong dapit.

“After the maintenance activities at the source from 1:00pm-4:00pm, BCWD continued with the temporary shut off of the facilities at the water source located at Sitio Iyao, Barangay Anticala due to the sudden occurrence of heavy rains at the Taguibo River Watershed causing high water turbidity,” mensahe sa water district.

Bunga niini, pipila ka mga dapit ning siyudad ang nakasinati sa hinay nga pressure sa tubig samtang ang nahimutang sa taas-taas nga bahin labi na kadtong nahimutang sa kinatumyang bahin sa “area of coverage” ang walay tubig nga ni-agas sa tagsa-tagsa ka gripo.

“Entire service area will experience low water pressure while end points of the system may be waterless,” dugang sa BCWD.

Subay niini, daling nangayo og dispensa si BCWD Senior Public Relations Officer Ramil S. Barquin sa tanang konsumidor sa maong kahimtang sa suplay sa tubig dungan sa panghinaut nga sabton ang maong sitwasyon.

“We sincerely regret the inconvenience. Thank you so much for your understanding,” dispensa ni Barquin.